Додека цела Америка сонува за историски успех на домашното Светско првенство кое само што не започнало, нивниот селектор веќе разгледува понуди за враќање во европскиот клупски фудбал. Маурисио Покетино одржал директна средба со претставници на Милан за преземање на испразнетото тренерско столче на „Сан Сиро“.
Овој неочекуван развој на настаните доаѓа во момент кога „Росонерите“ прават целосна чистка во раководството, барајќи човек кој ќе го врати гигантот на старите победнички патеки.
Земјотрес во Милано: Милан бара спас по катастрофалната сезона
Средбата меѓу Покетино и претставниците на Милан се одржала минатата недела, непосредно пред собирот на репрезентацијата на САД во нивниот камп во Џорџија. Аргентинскиот стратег е идентификуван како главен кандидат за наследник на Масимилијано Алегри, кој го напушти клубот по крајно разочарувачката сезона во која Милан заврши на петтото место во Серија А и втора година по ред остана без пласман во Лигата на шампионите.
Неуспехот предизвика вистински земјотрес во клубот. Во понеделникот, сопствениците на Милан спроведоа радикална чистка, разделувајќи се не само со Алегри, туку и со спортскиот директор Игли Таре, извршниот директор Џорџо Фурлани и техничкиот директор Жофри Монкада. Целта на новата управа е да изгради еден од највозбудливите фудбалски проекти во светот, а Покетино очигледно е високо на нивната листа на желби.
Дали Американците ќе останат без селектор по Мундијалот?
Договорот на 54-годишниот Аргентинец со Фудбалската федерација на САД (потпишан во септември 2024 година) истекува веднаш по завршувањето на претстојното Светско првенство. Иако Покетино во март навести дека би можел да остане на кормилото на репрезентацијата, повикот од клуб како Милан може лесно да ги промени неговите планови.
„Ние сме отворени за сите опции. Немаме договор за во иднина, но зошто да не продолжиме доколку и ние и федерацијата сме среќни?“, изјави Покетино пред само неколку месеци.
Доколку Покетино одлучи да се пресели на „Сан Сиро“, тоа би значело негово повторно обединување со американскиот репрезентативец и крилен напаѓач Кристијан Пулишиќ.
Сепак, Милан не ги става сите карти само на поранешниот тренер на Тотенхем, ПСЖ и Челси. Како многу сериозен, алтернативен кандидат за жешкото столче во Милано се споменува и Андони Ираола, кој моментално е слободен агент откако го напушти англискиот Борнмут.
