Формула 1 добива нов визуелен и комерцијален идентитет, откако познатиот италијански моден бренд Гучи беше потврден како нов главен и насловен партнер на тимот на Алпин. Соработката официјално ќе започне од сезоната во 2027 година, кога тимот ќе се натпреварува под новото име „Gucci Racing Alpine Formula One Team“.
Ова партнерство претставува историски чекор за најбрзиот циркус во светот, бидејќи Гучи станува првата луксузна модна куќа која се појавува како насловен спонзор на еден Ф1 тим.
Крај за розово-сината ера на БВТ
Со доаѓањето на новиот партнер, Алпин комплетно ќе го промени својот визуелен идентитет. Познатиот бренд за обработка на вода БВТ (BWT), кој донесе препознатливи розови и сини нијанси на болидите од 2022 година, заминува во историјата.
Од 2027 година, болидите на Алпин ќе ја носат традиционалната колоритна шема на италијанската модна куќа, во која доминираат црната, златната, црвената и зелената боја. Како дел од овој проект, лансирана е и посебна деловна и искуствена платформа наречена „Gucci Racing“, која ќе ги спои прецизноста и перформансите на автоспортот со луксузот.
Бријаторе и Белетини со огромни очекувања
Извршниот советник на Алпин, Флавио Бријаторе, не го криеше своето задоволство од постигнатиот договор, потсетувајќи дека тимот од Енстоун секогаш знаел да ги спои модата и спортот.
„Исклучително сум горд на партнерството со бренд од калибарот на Гучи. Тимот од Енстоун има историја на поинаков пристап од другите и претходно има покажано дека модата може да биде прва во Формула 1. Со подобрените перформанси на патеката, оваа соработка само го потврдува силниот моментум во кој се наоѓа тимот“, изјави Бријаторе.
Претседателката и извршна директорка на Гучи, Франческа Белетини, истакна дека ова е ново поглавје со кое се рефлектираат амбициите на брендот на глобалната сцена.
„Формула 1 денес претставува уникатен спој на перформанси, култура и глобален досег. Алпин е вистинскиот партнер за оживување на нашата визија. ‘Gucci Racing’ е повеќе од само присуство на патеката, тоа е израз на она што сме и каде сакаме да го однесеме брендот“, додаде Белетини.
Ренесанса на патеката за Алпин во 2026 година
Големата деловна вест доаѓа во време кога Алпин бележи фантастични резултати на патеката, правејќи огромен скок по катастрофалната 2025 година која ја заврши на самото дно. По само пет трки во новата сезона, тимот моментално се наоѓа на високото петто место во поредокот кај конструкторите.
Возачкото дуо на тимот испорачува врвни резултати: Пјер Гасли моментално се наоѓа на осмото место во поредокот кај возачите, додека Аргентинецот Франко Колапинто се наоѓа на 11-та позиција во неговата дебитантска фаза за тимот. Двата возачи заедно веќе освоија 35 бодови, што е далеку повеќе од вкупниот биланс од целата мината година кога тимот освои само 22 бода.
Влезот на Гучи како главен спонзор само го потврдува новиот тренд на привлекување луксузни брендови во Ф1, по стапките на ЛВМХ (LVMH), Томи Хилфигер и Хуго Бос, кои веќе имаат сериозно влијание во падокот.
