Пристапот кон пријателските натпревари често открива колку една репрезентација е сериозна во своите намери. Пред вечерашната пресметка на преполниот стадион „Кошево“ во Сараево, селекторот на Босна и Херцеговина, Сергеј Барбарез, и дефанзивецот Тарик Мухаремовиќ јасно ставија до знаење дека дуелот со Македонија го сфаќаат како вистински, натпреварувачки тест.
Босанската репрезентација го користи овој натпревар како клучен филтер пред заминувањето за Соединетите Американски Држави и настапот на Светското првенство, поради што стручниот штаб не дозволува ниту најмало опуштање.
Максимален респект: „Македонија е сериозен противник“
На официјалната прес-конференција, Барбарез остро ги отфрли сите сугестии дека ова е само ревијален натпревар, потенцирајќи дека потценувањето на противник како Македонија би било катастрофална грешка за неговиот тим.
„Ако не сте сериозни и ако не ги сфаќате пријателските натпревари како големи тестови, ќе изгубите од секого. Не сакам некој да нè омаловажува нас, па така и ние не го правиме тоа со другите. Македонија е многу сериозен противник. Имаат нов селектор, ги користат овие натпревари како подготовка за Лигата на нации и сигурно ќе се обидат да победат, исто како и ние“, истакна Барбарез пред новинарите.
Тактички експерименти и шанса за сите
Домаќините најавуваат комбиниран состав, бидејќи планот на Барбарез е да испроба различни варијанти во нападот и одбраната, но без да го жртвува интензитетот на играта. Дел од играчите, вклучувајќи го и капитенот Един Џеко кој доби мал одмор како превентива, ќе бидат поштедени, додека повредените Табаковиќ и Шуњиќ се очекува да бидат подготвени дури за настапот на Мундијалот.
„Ова е можност да видиме сè, идејата е да им дадеме на сите барем по едно полувреме. Некои играчи кои имаат ситни проблеми ќе ги одмориме за да не ризикуваме пред патувањето во Америка. Но, сите што ќе излезат на теренот мора да дадат 100 отсто од себе. Ова е вистински тест за карактерот. Сигурно ќе пробаме нешто поинакво бидејќи веќе покажавме дека можеме да ја менуваме формацијата и во текот на самиот натпревар“, додаде босанскиот селектор, не криејќи го задоволството што стадионот во Сараево ќе биде исполнет до последното место.
Челична дисциплина во соблекувалната
Младиот дефанзивец Тарик Мухаремовиќ, кој се очекува да добие минутажа на вечерашниот дуел, откри дека зад насмевките и добрата атмосфера во нивниот табор се крие напорна работа и строга хиерархија.
„Дисциплината се почувствува уште од првиот собир и точно знаеме по кој пат одиме. Голема благодарност до селекторот и стручниот штаб. Имаме врвна комуникација, се смееме и атмосферата е топ, но апсолутно сè е во рамките на дисциплината и напорната работа. Се надевам дека така и ќе остане“, изјави Мухаремовиќ.
Натпреварот меѓу Босна и Херцеговина и Македонија се игра вечерва, со почеток во 20:30 часот.
