Париската земја дефинитивно нема милост за актуелните владетели оваа година, па по шокантните елиминации на Јаник Синер и Новак Ѓоковиќ во машка конкуренција, турнирот во првата недела остана и без шампионката кај дамите. Коко Гоф ја заврши одбраната на тронот уште во третото коло, откако по голема борба претрпе пораз од крајно агресивната Анастасија Потапова.
Ова значи дека по машкиот дел, годинашново издание на Ролан Гарос дефинитивно ќе круниса сосем нова грен слем шампионка на финалниот викенд во Париз.
Брутален маратон и пресврт на 28-та носителка
Американката, која минатата година стигна до престижниот пехар со победа над Арина Сабаленка, во Париз пристигна без освоена титула во 2026 година, а нејзината ранливост максимално ја искористи мотивираната противничка. Потапова славеше со 4-6, 7-6 (7-1), 6-4 во меч кој траеше цели два часа и 39 минути.
Гоф добро го започна натпреварот и успеа да го освои првиот сет, но во продолжението одличната дефанзива и длабоките удари на Потапова почнаа да прават сериозни проблеми. Иако Гоф успеа да спаси сет-топки во вториот сет и да избори тај-брејк, таму целосно потфрли со серија непредизвикани грешки и двојни сервисни грешки. Во одлучувачкиот сет, Потапова покажа неверојатна упорност, запишувајќи вкупно 29 винери (дури 16 од бекхенд) за својот прв пласман во осминафиналето во Париз.
По исцрпувачките размени на удари, победничката едвај стоеше на нозе на теренот.
„Се соочувам со мали грчеви во моментов, но добро е, сè е во ред. Немам зборови со кои би ја опишала оваа среќа. Борбата што ја прикажавме двете беше неверојатна. Коко е голема шампионка и неизмерно ја почитувам. Неверојатно сум горда на себе што издржав на теренот и што се борев до последниот поен“, изјави пресреќната Потапова по мечот.
Отворена ждрепка и загарантирана сензација во полуфиналето
Покрај Гоф, во саботата елиминација доживеа уште една високорангирана американска тенисерка, шестата носителка Аманда Анисимова, која загуби од домашната претставничка Дијан Пари.
Ваквиот расплетот на настаните создаде целосен хаос во овој дел од костурот и отвори ретка историска шанса за тенисерките од сенка. Потапова во осминафиналето ќе ги одмери силите со Ана Калинскаја, а победничката од тој дуел ќе оди на подобрата од пресметката меѓу Дијан Пари и Полјачката Маја Чвалинска.
Тоа гарантира дека една од овие четири тенисерки (Потапова, Калинскаја, Пари или Чвалинска) сигурно ќе игра во големото полуфинале на Ролан Гарос, иако ниту една од нив во досегашната кариера нема поминато ниту во четвртфинале во Париз.
