Франција уште еднаш ја потврди улогата на главен фаворит за светската титула, декласирајќи ја Шведска со 3-0 во осминафиналето одиграно на „МетЛајф“ стадионот во Њу Џерси. Со оваа победа, „Триколорите“ го продолжуваат својот перфектен низ од четири победи на турнирот, при што досега постигнаа импресивни 13 погодоци.
Мбапе испиша историја
Килијан Мбапе повторно беше во центарот на вниманието, поставувајќи нов рекорд како најдобар стрелец во историјата на нокаут-фазите на Светските првенства, сега со вкупно 10 погодоци. Неговата игра, која стручњаците ја споредуваат со легендарната фраза на Мохамед Али – „лебди како пеперутка, каса како пчела“, беше нерешлива енигма за шведската одбрана.
Иако Мбапе беше движечката сила, овој триумф беше пред сè плод на колективната магија. Неговата соработка со Мајкл Олисе и Усман Дембеле функционира беспрекорно, создавајќи напаѓачко трио кое со својата брзина и креативност е незапирливо. По еден поништен погодок поради офсајд и удар во дирекот, Мбапе конечно ја затресе мрежата, по што истрча директно во прегратките на селекторот Дидие Дешамп, испраќајќи порака за поддршка во тежок личен период.
Мајсторијата на Олисе
Мајкл Олисе уште еднаш докажа зошто многумина го сметаат за најдобриот „плејмејкер“ во светот во моментов. Покрај тоа што го диктираше темпото на игра, тој беше блиску до постигнување на голот на турнирот кога неговите „ножички“ од работ на шеснаесетникот завршија директно во стативата. Олисе ја заврши средбата со две асистенции, со што го зголеми својот биланс на турнирот на вкупно пет, потврдувајќи дека е креативниот „мозок“ на овој француски тим. До крајот на мечот, Мбапе го постигна и својот втор гол за конечни 3-0.
Дали некој може да ја запре Франција?
Шведска, предводена од Греам Потер, се обиде да се спротивстави со дефанзивна поставеност 4-4-2 и брзи контранапади преку Исак, Ѓекереш и Еланга, но едноставно немаа одговор за квалитетот на Французите.
Франција сега има отворен пат кон финалето, избегнувајќи ги „мините“ во ждрепката. Во четвртфиналето ќе се соочат со Парагвај, што според аналитичарите, е идеална можност за пласман во полуфиналето, каде најверојатен противник би била Шпанија. Ако се суди според досегашните игри, се чини дека само Аргентина би можела да понуди вистински предизвик во големото финале.
