Скандалот со суспендираната казна на американскиот напаѓач Фоларин Балогун добива епски пропорции и се претвора во најголемата војна меѓу двете најмоќни фудбалски организации. Европската фудбалска куќа (УЕФА) излезе со официјално соопштение во кое брутално ја критикуваше одлуката на ФИФА да му дозволи на Балогун да игра во осминафиналето против Белгија, нарекувајќи го овој потег „невидено, неразбирливо и неоправдано“ прекршување на правилата.
Соопштението на УЕФА: Фудбалот не смее да биде над законите
Од УЕФА јасно ставија до знаење дека ФИФА ги погазила основните принципи на фер-плејот во спорт кој се потпира на еднакви правила за сите. Во официјалното соопштение на европската куќа на фудбалот се вели:
„Одлуката да се суспендира автоматската казна од еден натпревар по црвениот картон на Фоларин Балогун претставува преминување на црвената линија. Фудбалот се потпира на правила кои се основа за фер и транспарентно натпреварување. Автоматската суспензија не е дискреционо право или опција за избор. Кога сигурноста на правилата веќе не е загарантирана од нивните чувари, интегритетот на играта е загрозен, а кредибилитетот на натпреварувањето е целосно поткопан“.
Историски гледано, од вкупно 189 црвени картони доделени во историјата на Светските првенства, само уште еден единствен играч успеал да избегне суспензија. Тоа беше Бразилецот Гаринча во далечната 1962 година, во ера кога автоматските казни сè уште не беа воведени и кога целиот случај беше обвиен со сериозни сомнежи за политички притисоци.
Политички телефонски повици: Трамп притиснал кај Инфантино?
Она што дополнително ја зовре атмосферата е потврдата од „CBS News“, дека укинувањето на казната на Балогун следувало откако американскиот претседател Доналд Трамп остварил директен телефонски повик со претседателот на ФИФА, Џани Инфантино, во четвртокот. Трамп потоа јавно се заблагодари на социјалните мрежи, што предизвика лавина реакции.
На ова експресно реагираше поранешниот претседател на ФИФА, Сеп Блатер, кој отворено упати критики преку социјалната мрежа Х:
„Црвените картони не се поништуваат со политички телефонски повици, туку со правила и независни тела. Фудбалот никогаш не смее да стане игралиште за политичка моќ. Ако претседател на САД интервенира кај претседателот на ФИФА и играчот одеднаш е чист пред нокаут-меч, прашањето е неизбежно: Каде одиш, ФИФА?“
Томас Тухел во тотален шок: „Каде почнува ова, а каде завршува?“
Катастрофалниот преседан на ФИФА веднаш предизвика револт и кај останатите репрезентации. Селекторот на Англија, Томас Тухел, чиј дефанзивец Џарел Кванса заработи црвен картон во победата над Мексико (3-2), со иронија праша дали сега и тој треба да му се јави на Трамп за да ја поништи казната пред четвртфиналето со Норвешка.
„Каде почнува ова, а каде завршува сега? Можеме ли да поништуваме одлуки или не? Што се случува тука?“ – прашува разочараниот Тухел. „Балогун доби црвен картон по ВАР преглед, Кванса исто така. Ако ФИФА сега сама си ги гази правилата, тогаш зошто воопшто дебатираме за картони? Сакаме само конзистентност, ова што се случува е едноставно чудно.“
Белгија доби право на жалба во последен момент, се чека Спортскиот суд (ЦАС)
Белгиската фудбалска федерација веќе поднесе официјална жалба, а според информациите на „The Athletic“, ФИФА направила уште еден преседан и ѝ дозволила на Белгија да биде вклучена во дисциплинската постапка на својот противник. Белгијците имаат краток рок да го презентираат својот случај пред ФИФА.
Доколку светската куќа на фудбалот остане на својот првичен став и му дозволи на Балогун да истрча на теренот, Белгија е подготвена да покрене итна постапка пред ад-хок дивизијата на Спортскиот арбитражен суд (ЦАС), кој е задолжен за експресно решавање на споровите за време на овој турнир. Селекторот на Белгија, Руди Гарсија, уште еднаш повтори дека ова е „првоаприлска шега среде јули“ и дека тие не ја бранат само Белгија, туку ја бранат самата етика на фудбалската игра.
