Македонскиот шампион Вардар одигра херојски во регуларниот дел од реваншот против КуПС во Финска. Откако првиот натпревар во Скопје заврши со негатива од 0-2, „црвено-црните“ успеаја целосно да ја анулираат предноста на домаќините и со гостинска победа од 0-2 изборија продолженија во 1. квалификациско коло од Лигата на шампионите.
Офанзивна игра и покрај отсуството на класичен напаѓач
Вардарци одиграа далеку подобар и похрабар натпревар отколку пред седум дена. Сепак, навистина е штета што македонскиот првак одигра речиси два целосни натпревари без напаѓач во стартниот состав. И покрај тој хендикеп во офанзивата, бедемот на Финците конечно беше скршен во 59. минута. По еден одличен притисок во противничкиот шеснаесетник, дефанзивецот Саку Саволаинен несреќно реагираше и си постигна автогол за водство на Вардар од 0-1.
KuPS 0-1 Vardar [2-1 on agg.] – Saku Savolainen OG 59′
by u/atbg1936 in soccer
ВАР драма и златен пенал на Закариќ
Вистинската драма на стадионот во Куопио се случи во самиот финиш од натпреварот. Во 89. минута, по еден контакт врз новата аквизиција Родригеш во казнениот простор, шкотскиот судија Метју Мекдермид ја прегледа снимката преку ВАР технологијата и оправдано покажа на белата точка.
Одговорноста во овој критичен момент ја презеде искусниот Горан Закариќ. Во 91. минута, тој остана максимално ладнокрвен и прецизно реализираше за 0-2, носејќи огромна радост и израмнувајќи го вкупниот резултат на 2-2. Сега пред фудбалерите на Вардар претстојат клучни 30 минути во екстра-времето за да го комплетираат овој епски пресврт и да патуваат во следната фаза.
