Светското првенство во 2026 година се ближи кон својот апсолутен крај. Додека целата планета со нетрпение го очекува неделниот спектакуларен судир меѓу Шпанија и Аргентина, вечерва на импозантниот „Хард Рок Стадион“ во Мајами ќе се одигра натпреварот кој ФИФА официјално го брендираше како „Бронзено финале“. Поразените полуфиналисти, Франција и Англија, ќе ги одмерат силите во меч кој иако многумина го сметаат за дуел кој никој не сака да го игра, сепак носи неколку исклучително интересни приказни и мотиви.
Франција бара утеха на подиумот и историско збогување со Дешамп
До крахот во полуфиналето против Шпанија (0-2), Франција од повеќето аналитичари беше сметана за прв фаворит за златото. „Триколорите“ доминираа во досегашниот тек од турнирот, бележејќи брутална статистика со најмногу удари во рамките на голот (50) и највисок процент на очекувани голови (14.7 xG). Но, шпанската лекција ги приземји и сега момците на Дидие Дешамп мора да бараат мотивација за трет последователен мундијалски подиум, по златото во 2018 и среброто во 2022 година.
Овој натпревар ќе има огромна емотивна тежина бидејќи ќе биде последен за Дидие Дешамп на клупата на Франција, кој се повлекува по неверојатни 14 години на чело на националниот тим. Се очекува Дешамп да им даде мундијалски минути на играчите кои помалку настапуваа (Черки, Тирам, Канте, Заир-Емери), но со еден голем исклучок. Килијан Мбапе со сигурност ќе сака да биде на теренот. Францускиот капитен е изедначен со Лионел Меси со 8 постигнати голови во трката за Златната копачка, па ова е негова последна шанса да се закити со престижното индивидуално признание.
Ранетата Англија и обидот на Тухел за спас на атмосферата
Елиминацијата на Англија од Аргентина по доцниот пресврт (1-2) остави длабоки лузни кај „Гордиот Албион“. Англичаните сега го држат црниот мундијалски рекорд како единствена репрезентација во 21-виот век која двапати имала водство во полуфинале, а на крајот не успеала да се пласира во големото финале (претходно и во 2018 против Хрватска).
По жестоките критики кон Томас Тухел за неговата дефанзивна стратегија во финишот на полуфиналето, каде Англија имаше срамни 12% посед на топка по постигнатиот гол, овој натпревар е идеална прилика за германскиот стратег да ја врати позитивноста во и околу тимот пред септемвриските предизвици. Со оглед на тоа што Хари Кејн и Џуд Белингам (двајцата со по 6 голови) се целосно физички и емотивно исцрпени, Тухел драстично ќе го промени составот. Шанса од првата минута се очекува да добијат Маркус Рашфорд, Иван Тони, Оли Воткинс и младиот Коби Меину, кои ќе донесат свежина и мотив повеќе за докажување против силниот противник.
Традицијата е на страната на Французите, правдата ја дели познат Венецуелец
Историјата на пресметките меѓу овие два тима на Светските првенства е богата. Англија славеше во 1966 и 1982 година, но последното мундијалско соочување пред четири години во Катар заврши со болна елиминација за Англичаните во четвртфиналето (1-2). Гледано низ призмата на поновата историја, Французите се апсолутни владетели во ова ривалство – на последните девет меѓусебни дуели, Англија успеала да победи само еднаш, и тоа на пријателски натпревар во 2015 година.
Главен судија на вечерва ќе биде 42-годишниот Хесус Валенцуела од Венецуела, кој важи за еден од најдобрите јужноамерикански арбитри. Интересно е што Валенцуела веќе им има судено и на двете селекции на минатиот Мундијал – го водеше ремито на Англија со САД (0-0) и победата на Франција над Полска (3-1). Познат е како судија кој ретко посегнува по црвени картони, но нема да толерира груба игра на теренот.
- Време: 23:00 часот по македонско време
- Стадион: „Хард Рок Стадион“, Мајами (Флорида)
- Судија: Хесус Валенцуела (Венецуела)
