Јирген Клоп официјално се врати на фудбалската сцена! По повеќе од две години пауза од заминувањето од Ливерпул, харизматичниот стратег беше промовиран како нов селектор на репрезентацијата на Германија. Но, наместо вообичаените дипломатски флоскули на промоцијата во петокот, Клоп упати жесток ултиматум до германските медиуми.
Поранешниот менаџер на „Црвените“ доаѓа на местото на Јулијан Нагелсман, кој заработи отказ по разочарувачката елиминација од Парагвај во 1/16-финалето на Светското првенство ова лето. Свесен за бруталната медиумска хајка и нарушувањето на приватноста со кои се соочуваше неговиот претходник, 59-годишниот Клоп веднаш постави строги граници.
„Ако се однесувате лошо, си одам без отпремнина!“
Клоп јасно им порача на новинарите дека нема да толерира никакво навлегување во неговиот приватен живот и дека неговиот престој на клупата зависи исклучиво од меѓусебниот респект.
„Денот кога повеќе нема да ме сакате, само кажете ми го тоа и јас си одам. Без отпремнина. Ако утре кажете дека сум ѓубре, си одам. Секако, не ако го каже тоа само една личност, ќе треба малку повеќе од тоа. Но, ако федерацијата (ДФБ) каже дека сум ѓубре, си одам. Ако се однесувате лошо и не го оставите моето семејство на мира, веднаш си одам“, дециден беше новиот германски селектор.
Тој ја искористи можноста да ја критикува и „точноста“ на одредени извештаи поврзани со неговото назначување и договорот за заминување од Ред Бул, каде работеше како шеф за глобален фудбал. Клоп апелираше до новинарите во иднина да даваат приоритет на фактите и точноста, наместо на брзината на објавување на вестите.
Последен танц во кариерата?
Враќањето на Клоп во тренерските води донесе огромна еуфорија во Германија. Тој потпиша договор до 2030 година, што значи дека ќе ги води „Панцерите“ на Европското првенство во 2028 година и на Мундијалот две години подоцна. Заедно со него, во стручниот штаб пристигнува и неговиот долгогодишен соработник од Ливерпул, Пеп Лијндерс.
Сепак, на фановите им остана во сеќавање една негова изјава од промоцијата, која алудира дека ова би можело да биде последното поглавје во неговата блескава кариера.
„Јирген Клоп нема кариера по националниот тим. Во идеален случај, ова ќе биде врвот на мојата кариера“, заклучи Германецот.
