Империјата на алчноста мораше да отстапи пред сплотениот фудбалски свет! По незапамтениот глобален притисок, заканите за бојкот и жестокиот револт од навивачите, лигите и сите фудбалски конфедерации, претседателот на ФИФА, Џани Инфантино, официјално соопшти дека го повлекува скандалозниот проект за приватизација и продажба на акции од Светското првенство на приватни инвеститори.
Ова е победа со историски размери, доказ дека кога фудбалското семејство ќе застане сојузно, ниту еден милијардер или самоволен функционер не може да ја тргува душата на најважната споредна работа во светот.
Капитулација во Цирих: „Овој предлог нема да продолжи!“
Откако во текот на неделата се соочи со најавен бојкот од страна на УЕФА, недвосмислено одбивање од КОНКАКАФ и Азиската фудбалска конфедерација (АФЦ), како и со внатрешни оставки, меѓу кои и онаа на неговиот главен советник Карлос Кордеиро, Инфантино остана без опции.
Во официјалното соопштение објавено од ФИФА, тој неволно призна дека проектот „FIFA Forward Enterprise“ предизвикал длабоки поделби.
„Слушајќи ги внимателно сите ставови, стана јасно дека проектот создаде поделби од таква природа што повеќе не се во интерес на првичната цел. Нашата цел отсекогаш била и ќе биде, да обединуваме и подобруваме. Како резултат на тоа, овој предлог нема да продолжи“, изјави Џани Инфантино.
<Statement attributable to the FIFA President
— FIFA Media (@fifamedia) July 31, 2026
The FIFA Forward Enterprise project was intended to provide a basis for further strengthening our FIFA Member Associations and our sport worldwide, especially in those countries where support is most needed. And more so, as we said…
Жесток одговор од УЕФА: „Ја изгубивте довербата, вратете им ги парите на федерациите!“
Повлекувањето на планот не значеше стишување на страстите. Европската куќа на фудбалот (УЕФА) веднаш излезе со брутално искрено соопштение во кое јасно порача дека ова е само почеток на борбата за одговорност.
Европските фудбалски лидери потсетија дека Инфантино во 2016 година дојде на власт со ветувања за транспарентност и порака дека „парите на ФИФА се пари на националните асоцијации“. Наместо тоа, тој зад затворени врати се обиде да го продаде Светското првенство, додека на сметката на ФИФА лежат над 5 милијарди долари неискористени резерви!
„Ова е победа за целата игра, но не смее да биде крај на приказната. Не можеме да продолжиме вака со тајни шеми на брза лента, скроени од анонимни поединци водени само од финансиска корист. Мора да ги идентификуваме одговорните и да ги повикаме на одговорност. Сегашното раководство на ФИФА ја изгуби довербата на УЕФА и на многу други членки“, стои во жестоката реакција од Нион.
Победа за навивачите и за нашата филозофија
Оваа победа е директна потврда на принципите зад кои ние во Спортска Станица стоиме од првиот ден. Како што е дефинирано во нашиот Вајт Пејпер, ние веруваме во спорт ослободен од корпоративна експлоатација, приватни фондови и грабливи интереси кои гледаат на фудбалот единствено преку профитна маргина.
Светското првенство им припаѓа на децата кои сонуваат на улиците, на навивачите кои одвојуваат од својата плата за да ги бодрат своите земји и на сите 211 национални федерации кои секојдневно го градат фудбалот. Со здружени сили, фудбалскиот свет покажа дека одредени работи едноставно немаат цена!
