Возбудувањата на отвореното игралиште покрај Езерото во Струга продолжуваат со полна пареа. По вчерашното свечено отворање на 54. издание на Струшкиот турнир, каде што Вардар славеше над Прилеп, а Охрид ја совлада екипата на домаќинот Струга, денеска во вториот натпреварувачки ден видовме уште два исклучително динамични и квалитетни дуели.
Екипата на ГРК Охрид стана првиот сигурен финалист кој в сабота ќе се бори за трофејот, додека Прилеп во драматична завршница успеа да го сруши Бутел Скопје.
Охрид преку Дубочица обезбеди место во големото финале
Актуелниот бранител на трофејот, екипата на ГРК Охрид, ја оправда омилената улога и со победата над српскиот тим Дубочица Лесковац со 26-21 го чекираше своето место во саботното финале. Ова е втора победа за охриѓани на турнирот, по вчерашниот триумф над Струга, со што сигурно го освоија првото место во својата група.
Најзаслужен за таквиот исход беше хрватскиот чувар на мрежата Дино Славиќ, кој блескаше со дури 14 одбрани (од кои девет уште во првото полувреме). Охрид уште на стартот диктираше темпо и поведе со 11-6, но гостите од Србија се вратија на 11-10, за на пауза да се замине со предност на охриѓани од 14-12.
Во второто полувреме, благодарение на расположените Тилен Стрмљан (6 голови) и Доминик Мате (5 голови), Охрид во завршните десетина минути се одлепи на 23-18 и рутински го приведе мечот до крај. Кај Дубочица најдобри беа Вања Николиќ со пет и Горан Ристовиќ со четири погодоци.
Шоу на Трајкоски: Прилеп го сруши Бутел во драматична завршница
Во првиот натпревар од денешната програма, екипата на Прилеп славеше над Бутел Скопје со 31-29 во исклучително израмнет и борбен меч. Играч на натпреварот беше ветеранот на голот на Прилеп, Благојче Трајкоски, кој со нереални 16 интервенции му го расипа дебито на Стојанче Стоилов како главен тренер на клупата на Бутел Скопје.
Првото полувреме помина во израмнета борба (17-17), а Бутел во текот на тој период остана и без десното крило Бојан Спасовски кој заработи повреда на коленото.
Во вториот дел, Бутел во еден момент успеа да направи пресврт и да поведе со 26-24, но Прилеп, предводен од одбраните на Трајкоски и головите на Шипинкоски (вкупно 6), го врати водството на 28-26. Во драматичниот финиш, точките на победата ги стави Шабановиќ за конечни 31-29. Кај Бутел Скопје најефикасен беше Лука Јовиќ со 7 погодоци.
Со оваа победа, Прилеп е во одлична позиција да го освои второто место во групата и в сабота да игра во натпреварот за трето место.
