Екипата на Шкендија ја продолжи својата перфектна серија на стартот од новата сезона во Првата македонска фудбалска лига (ПМФЛ) откако триумфираше на гостувањето во Кратово. Во исто време, екипата на Струга Трим Лум забележа убедлива победа на домашен терен против штипска Брегалница.
Максимален ефект за Тетовци во сенка на катастрофална судиска грешка
Тетовска Шкендија дојде до својата петта победа во исто толку одиграни натпревари, задржувајќи го максималниот ефект од 15 бодови. Отпорот на домаќинот Силекс беше скршен дури во второто полувреме, откако во 53. минута Мелиќи одлично се снајде во противничкиот петерец по нафрлувањето на Ибраими и го совлада голманот Џеков за водство од 0-1. Точка на натпреварот стави Нзенгуе во 88. минута, кој по одличното додавање од Зејнулаи излезе сам пред противничкиот голман и рутински пласираше за конечни 0-2. Иако Силекс имаше своја прилика преку Анѓелески, голманот Рамани не дозволи да биде совладан.
Сепак, натпреварот во Кратово го одбележа и голем судиски скандал. Во 37. минута при резултат 0-0, на Шкендија ѝ беше поништен регуларен гол постигнат од Ибраими поради наводен офсајд. Иако помошниот судија првично дозволи акцијата да заврши со погодок, ВАР судиите Трпчевски и Петковски направија катастрофална проценка при влечењето на линиите во ВАР собата. Од Судискиот одбор веќе најавија санкции за судиите поради оваа клучна грешка, бидејќи при анализата било очигледно дека напаѓачот се наоѓал во дозволена позиција и не бил понапред од претпоследниот одбранбен играч на Силекс.
Христијан Малески ја инспирираше Струга за лесен триумф над штипјани
За разлика од тензијата во Кратово, екипата на Струга Трим Лум имаше лесна задача на домашен терен, каде со убедливи 4-0 ја совлада немоќната Брегалница. Со ова штипјани го запишаа и третиот пораз на третото гостување оваа сезона, покажувајќи дека на гостински терен не ги пружаат истите партии како на својот стадион. Христијан Малески беше главниот протагонист во победата на стружани, постигнувајќи ги првите два гола на мечот. Резултатот го отвори во 14. минута откако по изблокираниот шут на Шабани топката стигна до него на 6-7 метри од голот, а зголеми на 2-0 веднаш на стартот од вториот дел кога ја искористи грешката на гостинскиот дефанзивец Рајков.
Брегалница се обиде да возврати преку Темелков, чиј удар со глава заврши покрај голот, но надежите за враќање во мечот брзо згаснаа. Две минути по таа шанса, по една долга топка од Белица, резервистот Агама искористи недоразбирање во гостинската одбрана и голманот Јашар за да погоди во празната мрежа за 3-0. Конечните 4-0 ги постави Шабани во 75. минута откако по асистенција на Бојку излезе сам пред противничкиот голман. До крајот на мечот, двојниот стрелец Малески пропушти две одлични можности да стигне до хет-трик, но и покрај тоа, Струга ТЛ стигна до својата трета победа во петтиот овосезонски настап.
