Екипата на Комо ги искористи дефанзивните подароци од Наполи и забележа огромна победа од 2-1 на гостувањето на култниот „Диего Армандо Марадона“. Во тактичката пресметка меѓу Макс Алегри и Цеск Фабрегас, гостите се покажаа како пофокусиран тим и заслужено ги однесоа трите бода, нанесувајќи им болен удар на наполитанците пред нивните навивачи.
Студен туш за Алегри по срдечната прегратка
Иако минатата сезона имаа жестоки препукувања покрај аут-линијата, Алегри и Фабрегас пријателски се прегрнаа пред почетокот на мечот. Сепак, на теренот немаше место за пријателство.
Иако Комо доминираше со поседот во раната фаза, Наполи прв се закани. Но, гостите беа тие што први зададоа удар. Во 16. минута, Асане Диао одлично проби по десната страна и го пронајде Мартин Батурина, кој со мајсторски потег и прецизен удар ја смести топката во мрежата за 0-1.
Откако изненадувањето во стартниот состав, Ноа Ланг, пропушти чист зицер за израмнување, Расмус Хојлунд во 30. минута покажа зошто е главен адут во нападот. Данецот одлично се снајде на работ од шеснаесеттникот и испрати прецизен удар низ „шумата“ од нозе за 1-1.
Но, радоста на домаќините траеше само четири минути. Една катастрофална и несфатлива грешка на Замбо Ангиса, кој врати кратка топка кон Амир Рахмани, беше брутално казнета. Батурина ја пресече топката и несебично му асистираше на Тасос Дувикас, на кого не му беше тешко да ја врати предноста за Комо (1-2).
Офсајд драма во 95. минута и залуден влез на Де Брујне
Во обид да го сврти резултатот и да ја спаси честа, Алегри во второто полувреме ги фрли во оган Кевин Де Брујне, Алисон Сантос и Леонардо Спинацола. Наполи притисна со сите сили, Де Брујне креираше неколку опасни ситуации и за малку не се запиша во стрелците, но одбраната на Комо херојски издржа.
Вистинска драма се случи во 95. минута кога Станислав Лоботка ја затресе мрежата предизвикувајќи ерупција на трибините, но голот експресно беше поништен бидејќи судиите веќе имаа досудено офсајд на Лоренцо Лука во зачетокот на акцијата, оставајќи ги наполитанците со празни раце.
