Репрезентацијата на Бразил вечерва во Мајами ќе се соочи со Шкотска во клучниот натпревар од третото коло, со јасна цел – заверка на првото место во Групата Ц на Светското првенство.
Избраниците на Карло Анчелоти влегуваат во овој дуел со четири освоени бодови, исто колку и селекцијата на Мароко. Бидејќи нивниот меѓусебен натпревар заврши без победник, вкупната гол-разлика ќе го одлучи победникот во групата доколку двете репрезентации слават вечерва. Во моментов Бразил има предност од два гола, но Мароко игра против аутсајдерот Хаити, што значи дека математиката може брзо да се промени.
Поради оваа неизвесност, селекторот Анчелоти се најде пред сериозна дилема: дали да одмори дел од клучните играчи бидејќи пласманот во следната фаза е веќе суштински обезбеден, или да тргне со сите сили по сигурна победа и прво место? Италијанскиот стратег очигледно се одлучи за втората опција.
Анализа на почетниот состав на „Кариоките“
Анчелоти избра силен и офанзивен состав, без многу простор за ротации:
- Голман: Алисон Бекер останува незаменлив меѓу стативите, откако прими само еден гол на првите два натпревари.
- Одбрана: Квартетот го сочинуваат Данило, Маркињос, Габриел и Даглас Сантос. Интересно е што Анчелоти не калкулира со Даглас Сантос, кој добива шанса на левата бековска позиција и покрај тоа што му се заканува суспензија доколку добие жолт картон.
- Среден ред: Слична е ситуацијата и во средниот ред. Каземиро, на кого исто така му виси суспензија, ќе стартува против Шкотите, а друштво ќе му прават Бруно Гимараеш и Лукас Пакета.
- Напад: Матеус Куња сосема заслужено го задржува своето место во стартните единаесет по двата постигнати гола против Хаити. На крилните позиции ќе дејствуваат Винисиус Жуниор и младиот Рајан, кој влегува во првиот тим како директна замена за повредениот Рафиња.
Ќе дебитира ли Нејмар на овој Мундијал?
Најголемата вест за бразилските фанови е присуството на Нејмар. Откако ги пропушти првите два натпревари поради повреда на листот на ногата, легендарниот Бразилец конечно е „доспатен“ за игра, како што потврди самиот Анчелоти на прес-конференцијата. Се очекува Нејмар да го започне натпреварот од клупата за резервни играчи и да добие минутажа во второто полувреме.
Официјалниот состав на Бразил против Шкотска: Алисон; Данило, Маркињос, Габриел, Даглас Сантос; Каземиро, Бруно Гимараеш, Пакета; Рајан, Матеус Куња, Винисиус Жуниор.
