Кризата на „Енфилд“ се продлабочува. Ливерпул го запиша и петтиот последователен натпревар без победа во Премиер лигата, губејќи од Борнмут со драматични 3-2 со гол примен во последната секунда од мечот. Но, наместо критики за играта, менаџерот Арне Слот прстот го впери кон исцрпувачкиот распоред и алармантната листа на повреди.
„Крпена“ одбрана и играчи без енергија
Ливерпул го заврши натпреварот со нестварна дефанзивна линија во која играа играчи од средниот ред како Ватару Ендо и Доминик Собослаи, откако одбраната на „црвените“ десеткувана од повреди доживеа нов удар. Џо Гомез мораше да го напушти теренот по само 27 минути, приклучувајќи им се на Бредли и Леони на листата на отсутни, додека Ибрахима Конате беше отсутен поради семејна трагедија.
„Јасно е дека неколку играчи останаа без енергија. Не можам да ги критикувам за тоа бидејќи пред само два дена игравме тежок натпревар во ЛШ во Марсеј. Ние сме единствениот тим што имаше само два дена одмор меѓу двата меча“, изјави фрустрираниот Слот.
Проблеми и во нападот: Исак и Киеза „во аут“
Ниту офанзивниот дел не изгледа подобро. Рекордното засилување Александар Исак е надвор од терените поради повреда на коленото, а Федерико Киеза има мускулни проблеми. Слот призна дека мора „со калкулатор“ да ги мери минутите на своите клучни играчи како Екитике и Фримпонг за да не ризикува уште потешки повреди.
Слот влезе во клинч со новинарите
Иако резултатите се загрижувачки, холандскиот стратег не дозволува јавен притисок врз тимот. На прашањето на новинарите дали Ливерпул е „краток“ со играчкиот кадар веќе подолг период, Слот кратко и остро одговори: „Тоа е само ваше мислење“.
Менаџерот одби да зборува за нови засилувања во јануарскиот преоден рок, но јасно е дека со ова темпо и ваква листа на повреди, Ливерпул ќе има исклучително тешка задача да се врати во борбата за врвот.
