Микел Артета не ги криеше емоциите по историскиот триумф над Атлетико Мадрид, опишувајќи го пласманот во финалето како еден од најзначајните моменти во неговиот живот. Шпанскиот стратег го одведе Арсенал во нивното прво финале во Лигата на шампионите по цели 20 години, нагласувајќи дека сцените на стадионот и надвор од него биле нешто досега невидено.
Магична енергија и поддршка од навивачите
Клучот за победата, според Артета, била енергијата што ја пренеле навивачите уште пред првиот свиреж на судијата. Менаџерот истакна дека навивачите го поставиле стандардот на кој тимот морал да одговори.
„Ова е една од најдобрите ноќи што сум ги имал во мојата кариера. Мислам дека денес поддржувачите го подигнаа стандардот и ни кажаа како треба да го одиграме овој натпревар,“ изјави Артета на прес-конференцијата. Тој додаде дека приемот на автобусот бил уникатен: „Начинот на кој го пречекаа тимот надвор од стадионот беше уникатен – никогаш не сум го видел тоа претходно. Енергијата што се создаде беше нешто друго; нешто што ја подигнува убеденоста, енергијата и страста кај сите“.
The atmosphere outside the Emirates today is on another level as the fans welcome the Arsenal bus. pic.twitter.com/IVcTdmC9GD
— Futball Centa (@futballcenta) May 5, 2026
Тешката одлука за тимот и заедништвото
Еден од најинтересните детали беше признанието за тешките одлуки околу почетниот состав. Артета откри дека му било болно да остави важни играчи на клупата, но се водел по својот внатрешен инстинкт.
„Беше многу тешко да се донесат одредени одлуки. Разговарав со некои од момците попладнево, им се извинил и им реков дека ќе го играм истиот тим како против Фулам. Реакцијата веднаш беше: ’Шефе, тука сум кога ќе ти требам’, и ме прегрнаа“, откри Артета, нагласувајќи го неверојатното заедништво во соблекувалната. За стрелецот на клучниот гол, тој додаде: „Мораше да биде некој многу посебен, а Букајо дефинитивно е посебен за мене, за момците и за сите поврзани со овој клуб“.
Сонот за Будимпешта и фокусот кон Вест Хем
Иако славјето беше заслужено, Артета веднаш повика на стабилност, потсетувајќи дека работата не е завршена. Со 11 победи и 3 нерешени средби, Арсенал останува непоразен во Европа оваа сезона.
„Кога ги гледав трибините денес, моите играчи и персоналот, и кога ја видов нивната радост и среќа, сè што правиме добива смисла“, емотивно заклучи менаџерот. Сепак, тој веднаш се сврте кон неделниот предизвик: „Да уживаме вечерва, но утре мора да ги наполниме батериите до максимум и да почнеме да се подготвуваме за Вест Хем, бидејќи тоа е огромен натпревар“.
