Победата на Манчестер Сити над Арсенал донесе олеснување и огромен оптимизам во таборот на „граѓаните“. Веднаш по мечот, главните протагонисти не го криеја задоволството од начинот на кој стигнаа до трите бода, нагласувајќи ја борбеноста како клучен фактор за успехот.
Силва: „Сега сè е во наши раце“
Бернардо Силва, кој одигра уште еден неуморен натпревар во средниот ред, потенцираше колку брзо се промени ситуацијата на табелата во Премиер лигата.
„Ова е огромна победа. Не става во позиција каде што, ако го добиеме заостанатиот натпревар, ќе бидеме со ист број бодови како Арсенал. Пред неколку недели ова не изгледаше како многу веројатно сценарио. Беше тежок натпревар, но среќни сме што сме во оваа ситуација“, изјави Силва, кој посебно го пофали својот соиграч во нападот, велејќи дека „Халанд денеска се бореше како животно“ за секоја топка.
Халанд: „Бернардо денеска беше како Канаваро“
Стрелецот на одлучувачкиот гол, Ерлинг Халанд, беше во одлично расположение и не штедеше комплименти за „џебниот мајстор“ од Португалија. Халанд откри еден интересен момент од теренот кога Силва успеал да добие воздушен дуел против многу повисокиот Виктор Ѓокереш.
„Искрено, пресреќен сум! Беше голем момент за мене. Секогаш е вака во дерби – многу борба и тензија. Кога Бернардо ја исфрли топката со глава пред Ѓокереш, му пријдов и му реков: ’Денеска беше како Канаваро!’. Не сакам да станам премногу емотивен, но Берни денеска беше навистина неверојатен“, изјави норвешкиот голгетер.
Со овој триумф и ваквата атмосфера во соблекувалната, Манчестер Сити испраќа јасна порака до Лондон дека се подготвени сериозно да се борат за титулата.
Повеќе информации и детална анализа за овој натпревар следуваат наскоро…
