Македонската А-репрезентација експресно го добива својот нов лик. Само неколку часа по официјализацијата на Гоце Седлоски за селектор, неговиот матичен клуб, ГФК Тиквеш, потврди дека шефот на нивниот стручен штаб, Борче Христов, е назначен за прв помошник во националната селекција.
Изборот на Христов за прв асистент не е изненадување за познавачите на фудбалот, со оглед на неговото богато искуство и прецизноста во работата која ја демонстрираше во изминатиот период водејќи го кавадаречкиот прволигаш. Седлоски очигледно се одлучи за проверено име кое одлично го познава пулсот на домашниот шампионат и играчите кои би можеле да бидат дел од новиот циклус.
Од Тиквеш веднаш се огласија со поддршка за својот стратег, горди што нивниот тренер ќе биде дел од највисокото ниво на македонскиот фудбал.
„Нашиот шеф на стручниот штаб, Борче Христов, денес е назначен за прв помошник на новиот селектор Гоце Седлоски. Им посакуваме среќна и успешна работа со пласман на Светско првенство!“, стои во соопштението на ГФК Тиквеш.
Ова назначување е само почеток на екипирањето на стручниот штаб кој ќе го предводи Седлоски, а кој официјално ќе биде претставен на денешната промоција во 11:30 часот.
