Квалификациите за Големата награда на Азербејџан донесоа невидена драма со рекордни шест црвени знамиња, а на крајот Макс Верстапен успеа да ја одбрани пол-позицијата и да го спречи Карлос Саинц да приреди изненадување.
Возачот на Ред Бул стигна до својата втора последователна пол-позиција, поставувајќи време од 1:41.117, со речиси половина секунда предност пред возачот на Вилијамс. Голема улога одиграа прекините и дождот кој почна да ја лади патеката токму во завршните кругови.
Во моментот кога Саинц, Лијам Лосон и Исак Хаџар веќе имаа запишано време во третата рунда од квалификациите, Шарл Леклер удри во заштитната бариера на свиокот број 15, со што предизвика ново црвено знаме и им ја уништи шансата на останатите да ги комплетираат своите обиди.
По рестартот, Ландо Норис и Верстапен беа на пат кон најбрзи сектори, но тогаш драмата ја зголеми Оскар Пијастри. Лидерот во генералниот пласман удри во ѕидот на свиокот број 3 и предизвика уште еден прекин, оставајќи помалку од четири минути до крај.
Кога светлото конечно се вклучи на зелено, условите беа далеку од идеални. Возачите тргаа во последен обид да пронајдат држење на патеката, а Верстапен со совршен круг успеа да го потисне Саинц на второто место.
Лосон ја задржа третата позиција со одличен втор обид, зад себе оставајќи ги Мерцедесите на Кими Антонели и Џорџ Расел, како и вториот болид на Ред Бул, Јуки Цунода.
