Англискиот фудбал уште еднаш докажа зошто е најатрактивен во светот, а вистинската драма овој пат не се случува во Премиер лигата, туку во петтиот ранг на натпреварување, Националната лига.
Фудбалските фанови ширум светот со нетрпение го очекуваат следното, последно коло од сезоната, кое ќе донесе директна битка за титулата и промоција во Лига 2 помеѓу Јорк Сити и Рочдејл.
Драма во 97. минута!
Она што се случи изминатиот викенд (41. коло) наликува на холивудски филм. Јорк Сити го прегази Јеовил со 3:0 и стигна до вртоглави 107 бодови. Бидејќи во исто време нивниот единствен конкурент Рочдејл играше нерешено (1:1) на гостувањето кај Сатон Јунајтед, играчите и навивачите на Јорк почнаа со шампионското славје на теренот, мислејќи дека сè е готово.
Но, тогаш се случи шок. Додека фудбалерите на Јорк Сити славеа, во 97. минута од судиското надополнување, Иан Хендерсон постигна победнички гол за Рочдејл (1:2), носејќи го својот тим до 105 бодови. Овој гол ги прекина прославите на Јорк и ја одложи промоцијата за следната недела.
Hope you're enjoying that journey home, Dale fans 💙
— Rochdale AFC (@officiallydale) April 18, 2026
One more to go 👊#rafc pic.twitter.com/jLA5JdIqTl
Директен судир за место во Лига 2
Правилата во Националната лига се немилосрдни, само една екипа (шампионот) оди директно во Лига 2, додека екипите од второто до седмото место играат исцрпувачки плеј-оф.
Сценариото за последното коло не можеше да биде подобро: Рочдејл (105) го пречекува Јорк Сити (107) во директен судир кој решава сè! На Јорк му е доволен и бод за да ја осигура титулата и промоцијата, додека Рочдејл мора да победи ако сака да избегне плеј-оф и директно да влезе во професионалниот фудбал.
Фактот што екипа со над 100 освоени бодови (што би било доволно за титула во речиси секоја друга лига во светот) ќе мора да игра во плеј-оф е неверојатен и покажува колку е брутална конкуренцијата во англиските пониски лиги. Фудбалскиот свет веќе го прогласи овој натпревар за „најважниот натпревар во светот следниот викенд“.
