Летниот фудбалски камп на Црвена Звезда и ФК Форца во Скопје влезе во својот втор ден, а работата веќе се одвива со полна пареа. Откако вчерашните тренинзи го означија почетокот на оваа фудбалска бајка за младите таленти, денес на програмата беше сериозна работа.
Под будното око на тренерите од младинската школа на Црвена Звезда, младите надежи поминаа низ детално моторичко тестирање. Ова не е само обично трчање со топка – секој иден ас беше подложен на професионални тестови за брзина, агилност, координација и експлозивност. Овие податоци се клучни за стручниот штаб да добие јасна слика за потенцијалот на секое дете и да им даде насоки за нивниот понатамошен развој.
Токму ваквиот професионален пристап е она што го прави овој камп посебен. За овие момчиња и девојчиња, ова е првиот чекор во остварувањето на нивниот сон. Анализата на нивните способности е патот кон тоа да се стане вистинска “Ѕвездина Ѕвезда”.
Кампот продолжува со интензивни тренинзи во наредните денови, а борбата за главната награда – пробни тренинзи во Белград – станува сè пожестока. Редакцијата на Спортска Станица останува на терен да ги следи идните шампиони.
