Љубителите на фудбалот со нетрпение го очекуваат 16 април, кога на платформата Нетфликс премиерно ќе биде прикажана новата документарна серија за еден од најголемите виртуози со топката во историјата, неповторливиот Роналдињо. Серијалот кој го носи насловот „Ronaldinho: The One and Only“ низ три епизоди ќе ја претстави животната приказна на бразилскиот генијалец, а продукцијата ветува досега никогаш невидени снимки и ексклузивни интервјуа со фудбалските икони како Лионел Меси, Нејмар и Роберто Карлос.
Dive into the journey of one of the greatest players of all time, with exclusive access, never-before-seen material, and testimonials from icons such as Lionel Messi, Neymar and Roberto Carlos.
RONALDINHO: THE ONE AND ONLY arrives 16 April on Netflix! pic.twitter.com/utDxsAp6Ob
— Netflix UK & Ireland (@NetflixUK) April 1, 2026
Приказната за бразилскиот плејмејкер е исполнета со огромни подеми и драматични падови, кои ќе бидат детално обработени во документарецот. Гледачите ќе имаат можност да се потсетат на неговите почетоци и патот до светскиот врв кога во 2002 година со Бразил стана светски шампион, потоа на златната ера во дресот на Барселона на „Камп Ноу“, како и на периодите поминати во Пари Сен Жермен, Милан и Фламенго. Серијата нема да ги премолчи ниту помалку славните моменти, вклучувајќи го и неговиот престој во парагвајскиот затвор по завршувањето на професионалната кариера. Иако неговиот пик на теренот можеби не траеше долго, неговиот стил на игра беше пламен кој гореше со неверојатен интензитет.
Ова остварување е дел од големиот триптих документарци посветени на бразилскиот фудбал кои пристигнуваат на Нетфликс пред почетокот на Светското првенство во САД, Канада и Мексико. Покрај приказната за Роналдињо, на 7 мај следува документарец за шампионската генерација на Бразил од 1994 година, која славеше токму на американско тло, додека на 8 јуни премиерно ќе биде прикажан филмот за „Super Copa Pioneer“, најпрестижниот аматерски турнир во Сао Паоло каде што се калеле многу од најголемите јужноамерикански ѕвезди.
Гостинска статија на Марија Петровска
