Младите футсалци на СОУ „Ристе Ристески – Ричко“ од Прилеп ја остварија највисоката победа на досегашниот тек на Европското првенство за средношколци во Бања Лука. По почетното реми со Словачка, македонскиот претставник денеска ја демолираше селекцијата на Унгарија со убедливи 10-1.
Нашите момци доминираа во текот на целиот натпревар, покажувајќи врвна ефикасност и техничка надмоќ над противникот. Оваа победа е јасен сигнал дека Македонија има амбиции за висок пласман на овој континентален собир.
Ведран Маленски со хет-трик во мрежата на Унгарија
Листата на стрелци на овој натпревар ја предводеше расположениот Ведран Маленски, кој постигна три погодоци. Со два гола се истакнаа Андреј Петрески и Бруно Стефаноски, додека по еднаш во листата на стрелци се запишаа Бернис Селимоски, Тодор Героски и Димитар Оклески.
Колективната игра и борбеноста која ја побараа репрезентативците Шишковски и Херера при нивната вчерашна посета, денеска вроди со плод на теренот.
Против Белгија за првото место во групата
Македонските футсалци немаат многу време за одмор, бидејќи веќе денеска во 15:30 часот ги очекува последниот и клучен натпревар од групната фаза против Белгија.
Математиката е јасна – со победа на овој дуел, момците на тренерот Илија Ангелески најверојатно ќе завршат како првопласирани во својата група, што би им донело полесен противник во следната фаза и би го потврдило епитетот на едно од најпријатните изненадувања на шампионатот во Босна и Херцеговина.
