Она што се шпекулираше подолго време, сега добива официјална потврда. Според португалска „А Бола“, еден од клучните играчи на Пеп Гвардиола, Бернардо Силва, ги известил челниците на Манчестер Сити дека нема намера да го продолжи договорот кој му истекува ова лето.
Со ова се става крај на една брилијантна 9-годишна соработка во која Португалецот стана синоним за успесите на „Граѓаните“.
Која е следната дестинација?
На 31-годишна возраст, Силва како слободен агент ќе може да бира каде ќе ја продолжи кариерата. „А Бола“ открива дека негов приоритет останува Европа, а најсериозни кандидати се:
- Барселона: Клуб за кој Бернардо покажува симпатии со години, иако останува прашањето дали Каталонците имаат простор и финансии за него покрај веќе преполниот среден ред.
- Јувентус: Италијанскиот гигант е подготвен да му понуди тригодишен договор и плата од околу 7-8 милиони евра по сезона за да го доведе во Серија А.
- Галатасарај: Турскиот шампион исто така будно ја следи ситуацијата.
Иако има астрономски понуди од Саудиска Арабија, како и повик од Интер Мајами (каде игра Лео Меси), Португалецот сака да остане во конкурентен европски фудбал. Враќање во матичната Бенфика е исклучено во овој момент.
Реакциите на навивачите: „Најголемиот фудбалски штетник, ама генијалец!“
Веста за заминувањето на Силва предизвика лавина реакции на социјалните мрежи, каде навивачите на останатите премиерлигашки клубови не го криеја своето олеснување.
„Тој беше одличен за Сити и неподносливо копиле за секој друг клуб во Премиер лигата,“ гласи најпопуларниот коментар.
Навивачите се согласни во едно, Силва беше мајстор за тактички фаули, провокации и „ситни валкани трикови“ за кои ретко добиваше жолти картони, но во исто време беше играч со невидена интелигенција и работна етика.
За навивачите на Сити, тој заминува како апсолутна легенда која ќе биде речиси невозможно да се замени. За останатите… па, тие веќе слават што повеќе нема да мораат да го гледаат како им ги кине нервите секој викенд.
