Македонскиот фудбалски великан Вардар го потврди ангажманот на Миодраг „Гроф“ Божовиќ за нов шеф на стручниот штаб, потпишувајќи договор со него до летото 2028 година. На хартија, ова треба да претставува долгорочен проект и еден од најзвучните тренерски трансфери во македонскиот фудбал. Но, во реалноста, ангажманот на црногорскиот стратег доаѓа во момент кога клубот одвнатре гори, а односите со најверните навивачи се пред целосен колапс.
Кој е Миодраг „Гроф“ Божовиќ? Трофејно минато и неславна статистика
Педесет и осумгодишниот стратег, кој својот прекар го добива поради елегантното држење и стилот на облекување, носи со себе сериозно интернационално портфолио. Божовиќ изгради огромно реноме во Русија, каде што предводеше низа прволигаши како Амкар Перм, Москва, Динамо Москва и Локомотив Москва, а најголемиот успех го оствари со Ростов, освојувајќи го Купот на Русија во сезоната 2013/14.
На балканските простори е најпознат по својот престој на клупата на белградска Црвена Звезда. Со „црвено-белите“ во сезоната 2015/16 доминантно ја освои шампионската титула во Србија, рушејќи рекорди по бројот на врзани победи. Сепак, неговата понова историја укажува на сериозна нестабилност која фрла поинаква светлина врз неговиот авторитет.
Во февруари минатата 2025 година, Божовиќ заработи отказ во иранскиот клуб Естегал Кужестан по само осум месеци работа. Она што е фрапантно е податокот дека тоа беше дури 19-ти пат во неговата кариера да остане без работа, а да не состави ниту една полна година на клупата на еден тим. Поради оваа неславна статистика, дел од регионалните медиуми иронично го нарекоа „Краткоостаниќ“. Дополнително, во белградските фудбалски кругови тој сè уште се памети како тренер кој во финишот од сезоната успеа да испушти веќе „обезбедена“ титула со Црвена Звезда, губејќи клучни бодови од Партизан и Вождовац.
Со оглед на ваквото минато, најавениот договор со Вардар до 2028 година звучи крајно амбициозно, па дури и нереално. Како тренер кој ретко преживува 12 месеци ќе издржи четири години во средина која е пред целосна имплозија?
Златен покрив на куќа пред распаѓање
Сепак, колку и да звучи импресивно неговото резиме, доаѓањето на Божовиќ во Скопје не може да го маскира тоталниот институционален хаос во кој се наоѓа ФК Вардар. Овој потег на раководството повеќе наликува на очаен обид за купување мир, отколку на здрава спортска стратегија, особено ако се земе предвид контекстот во кој се случува.
Пред само неколку дена, нашиот портал пишуваше за апсурдните и срамни сцени кои го обиколија регионот. Додека фудбалска Европа ужива во мајстории на зелениот терен, нашиот главен „хајлајт“ беше директор на клубот кој уринира на трибините за време на натпревар. Овој скандал беше само капка која ја прели чашата на континуираниот аматеризам и деградирање на светото име на клубот од страна на актуелните раководни структури.
Точка на вриење: Комитите подготвуваат бојкот
Сјајот на новото тренерско име не успеа да ги заслепи навивачите. Напротив, револтот кај „Комитите“ ја достигна својата кулминација. Навивачката група која во најтешките години буквално со сопствени раце и финансии го спаси Вардар од згаснување, одбива да биде нем набљудувач на рушењето на угледот на клубот.
По синоќешниот итен и бурен состанок на навивачката група, атмосферата е доведена до точка на вриење. Според информациите, се подготвува целосен бојкот на натпреварите и радикализација на протестите против управата. Навивачите сметаат дека проблемот на Вардар не е на клупата, туку во канцелариите, и дека ниту еден тренер, па бил тој и „Гроф“, не може да донесе успех во средина каде што недостасуваат основна почит, транспарентност и професионализам.
Прашањето што сега лебди над Скопје не е дали Божовиќ знае фудбал – неговата историја зборува за тоа. Вистинското прашање е како еден „Гроф“ ќе преживее во ваква анархија, и дали воопшто ќе има кој да ги бодри неговите играчи доколку трибините останат празни.
