Она што се шпекулираше во изминатите неколку дена, сега доби и (не)официјална потврда од најпознатиот светски спортски новинар Фабрицио Романо: „Мајкл Керик останува. Here we go!“
По турбулентната сезона и многуте прашалници околу менаџерската позиција на „Олд Трафорд“, раководството на Манчестер Јунајтед реши да му ја довери довербата на Керик за следните три години. Оваа одлука предизвика лавина реакции кај навивачите на „Црвените ѓаволи“, но и кај ривалите.
Навивачите поделени: Враќање на славните денови или ново разочарување?
Веста за останувањето на Керик веднаш ги запали социјалните мрежи. Додека еден дел од навивачите на Јунајтед веруваат дека поранешниот играч од средниот ред е вистинскиот човек за обнова на тимот, други се скептични и потсетуваат на слични сценарија од минатото.
„Carrick Ball ќе гази следната сезона… ќе бидеме таму“, коментира еден оптимистичен фан, додека друг додава: „Конечно останува на 3 години, ова е добра вест. Керик покажа дека заслужува да биде главен тренер на Манчестер Јунајтед во овој краток период“.
Сепак, ривалските навивачи не пропуштија шанса за сеир. „Ова го зборевте и кога Аморим беше главен“, „И Оле Гунар Солскјер почна вака, па знаеме како заврши“, и „Време за неуспех активирано“ се само дел од коментарите кои предвидуваат уште една тешка сезона за гигантот од Манчестер.
Може ли Керик да го прероди Јунајтед?
За разлика од претходните менаџери кои доаѓаа со големи ветувања, Мајкл Керик е познат по својата смиреност, дури и кога работите не одат според планот. „Смиреноста што ја покажува Мајкл Керик дури и кога сè е против нас е едноставно луда. Честитки до тивката легенда“, потенцира еден од поддржувачите на тимот.
Останува да видиме дали Керик ќе го оправда овој кредит од управата и дали неговиот „Carrick Ball“ навистина ќе биде одговор на кризата која со години го тресе „Олд Трафорд“. Очекувањата се големи, а притисокот е уште поголем. Едно е сигурно, следната сезона во Премиер лигата ќе биде пеколно интересна.
