По неколкучасовна неизвесност и страв дека сезоната за најдобриот кошаркар на светот е завршена, од таборот на Денвер Нагетс конечно пристигнаа вести кои носат олеснување. Никола Јокиќ избегна кинење на лигаментите, но сепак ќе мора да помине одреден период на рехабилитација надвор од паркетот.
Деталните прегледи со магнетна резонанца потврдија дека се работи за хиперекстензија на левото колено. Иако падот по дуелот со соиграчот Спенсер Џонс изгледаше застрашувачки, структурите на коленото останале неоштетени. Лекарскиот тим на Денвер објави дека следната контрола е закажана за четири недели, што значи дека целиот јануарски циклус ќе помине без популарниот „Џокер“.
Иако веста дека Јокиќ ќе се врати сезонава е одлична, неговото отсуство создава сериозен проблем во трката за историското четврто МВП признание. Според новите правила на НБА, еден играч мора да одигра најмалку 65 натпревари за да биде во конкуренција за индивидуалните награди. Доколку рехабилитацијата потрае и Јокиќ пропушти повеќе од 15 натпревари, тој автоматски ќе биде дисквалификуван од МВП трката, без оглед на неговата монструозна статистика од речиси 30 поени со „трипл-дабл“ просек.
За тимот на Денвер сега почнува најтешкиот период во досегашниот дел од шампионатот. Без својот лидер, тимот кој моментално ја држи третата позиција на Западот ќе мора да најде начин да опстане во елитата до крајот на јануари, кога се очекува повторно приклучување на Јокиќ во составот.
