Ако мислевте дека шокантната елиминација на првиот рекет Јаник Синер ќе биде единствениот голем потрес на Ролан Гарос, сериозно се излажавте. Горната половина од машката ждрепка се претвори во вистинско минско поле за големите фаворити.
Само еден ден откако започна „чистката“ на носителите, париската земја зеде нова голема жртва во името на петтиот носител Бен Шелтон, додека отворениот простор во ждрепката максимално го искористи италијанскиот „Гладијатор“ Матео Беретини за да потсети на своите најдобри денови.
Белгиска сензација: Колињон беспрекорен против Шелтон
Откако освои титула во Минхен, Бен Шелтон важеше за скриен фаворит од сенка, но неговиот пат во Париз заврши уште во второто коло. Аутсајдерот Рафаел Колињон, носен од огромната поддршка на белгиските фанови на трибините, го нокаутираше Американецот со чисти 3-0 во сетови (6-4, 7-5, 6-4).
Колињон одигра совршен натпревар во кој освои неверојатни 43 од 49 поени на прв сервис и не му дозволи на Шелтон ниту една брејк шанса. Со ова, тој стана првиот Белгиец кој победил Топ 5 играч на грен слем турнир по пауза од 13 години, тргнувајќи по стапките на својот тренер Стив Дарсис (кој своевремено го шокираше Надал).
„Ова беше неверојатна атмосфера. Многу е емотивно бидејќи, како Белгиец, редовно доаѓав овде на Ролан Гарос како гледач. Самото тоа што играм на овој терен за мене е остварување на сонот. А да победам пред моите најблиски, пред моето семејство… тоа е навистина неверојатно“, изјави Колињон низ солзи.
Тој додаде дека советите од неговиот тренер биле клучни за големиот триумф, но и способноста да се фокусира исклучиво на сопствениот, агресивен сервис без да му дозволи на противникот да ја диктира играта. Со елиминацијата на Шелтон и Синер, Феликс Оже-Алијасим останува единствениот Топ 8 носител во оваа половина од ждрепката.
Будењето на „Гладијаторот“: Беретини го замолкна Париз
Ваквиот хаос меѓу носителите е идеално сценарио за тенисери кои се враќаат од повреди и бараат шанса за голем камбек. Токму тоа го направи Матео Беретини. Поранешниот Топ 10 играч го замолкна преполниот терен „Филип Шатрие“, совладувајќи го најдобро рангираниот домашен тенисер, 22-от носител Артур Риндеркнеш, со идентични 3-0 во сетови (6-4, 6-4, 6-4).
За Беретини, ова е прво учество на Ролан Гарос по цели пет години и прв пласман во трето коло на грен слем по 2023 година.
„Бев среќен уште денеска кога се разбудив. Вчера кога дознав дека играм на централниот терен… поминаа многу години. Знаев дека атмосферата ќе биде неверојатна, едноставно ми недостигаше да играм и да уживам во вакви натпревари. Навистина сум горд на работата што ја вложив за да се вратам и повторно да се чувствувам добро,“ истакна Беретини.
Отворањето на ждрепката значи дека Беретини, иако не е носител, сега има сериозна шанса за длабок пробив на турнирот.
„Ова беше едно долго патување. Многу повреди, многу лоши моменти. Ми недостигаше овој турнир толку многу. Играм тенис на навистина високо ниво, но турнирот сè уште не е завршен за мене,“ предупреди мотивираниот Италијанец.
