Последниот дел од сложувалката е тука! Од денеска, македонската ракометна репрезентација работи со полна пареа и во комплетен состав, откако на тренинзите во Скопје се приклучи и Мартин Томовски.
Одличниот голман на германскиот Битигхајм, кој имаше клупски обврски до самиот крај на 2025 година, му се стави на располагање на селекторот Кирил Лазаров. Неговото пристигнување е огромно засилување, особено ако се знае дека Мартин Томовски блеска во Германија со неверојатни 51% успешност, што влева дополнителна сигурност пред големите предизвици.
Божиќен лет за Винтертур
„Рибарите“ веќе го одработија првиот дел од подготовките и контролниот меч против Хрватска во Пореч, а сега следи финалната глазура. По неколку тренинзи во Скопје, на 7 јануари (Божиќ), експедицијата заминува за Швајцарија.
Таму, на турнирот „Жолт куп“, Македонија ќе ги мери силите со Швајцарија, Бахреин и Украина. Тоа ќе биде последниот филтер пред она вистинското – старт на ЕП во Данска со силен состав и пеколното отворање против домаќинот на 16 јануари.
Сите сме на број, повредите се минато (со исклучок на Карасманакис), време е за ракомет!
