Токму во моментот кога Реал Мадрид го прослави пласманот во четвртфиналето на Лигата на шампионите по елиминацијата на Манчестер Сити, во Мадрид пристигнаа лоши вести. Првиот голман на „кралевите“, Тибо Куртоа, ќе мора да паузира најмалку шест недели поради повреда на мускулот на десната нога, потврдија денеска од шпанскиот клуб.
Белгискиот џин почувствува болка за време на реваншот против Сити и беше заменет на полувремето, а деталните прегледи извршени во четвртокот покажаа дека повредата е посериозна отколку што првично се мислеше.
Кралскиот гол ќе го брани „џокерот“ Лунин
Оваа повреда доаѓа во најлош можен момент за тимот на Алваро Арбелоа. Куртоа дефинитивно ги пропушта двата клучни натпревари во четвртфиналето на Лигата на шампионите против Баерн Минхен (7-ми и 15-ти април), а неговиот настап е под голем знак прашалник дури и за евентуалното полуфинале.
Сепак, навивачите на Реал имаат причина за умерена доза спокој бидејќи на голот повторно застанува Андриј Лунин. Украинскиот голман веќе неколку пати докажа дека е најдобрата можна замена, особено за време на сезоната 2023/24 кога блескаше токму во отсуство на Куртоа. Лунин веќе в недела ќе го има првиот голем тест во жешкото мадридско дерби против Атлетико Мадрид, натпревар кој е од огромно значење во трката за титулата со Барселона.
Болницата во Мадрид не престанува да се полни
Повредата на Куртоа само го продлабочува огромниот проблем со кој се соочува стручниот штаб на Реал Мадрид оваа сезона. Иако претседателот Флорентино Перез во јануари ги врати во тимот кондицискиот тренер Антонио Пинтус и д-р Нико Михиќ за да го решат прашањето со честите повреди, ситуацијата на теренот не се менува.
Арбелоа моментално не може да смета на низа клучни играчи, меѓу кои Џуд Белингам, Родриго и Едер Милитао. Овој „бран“ на повреди, кој многумина во клубот го припишуваат на преоптовареност, сериозно му ги врзува рацете на младиот тренер во пресрет на најважниот дел од сезоната, каде секој кикс може да значи губење на трофеите.
