Македонската ракометна репрезентација денеска и официјално ги започна подготовките за претстојното Европско првенство 2026. Во базата во Скопје, селекторот Кирил Лазаров ја изврши првата прозивка на националниот тим, означувајќи го почетокот на операцијата во која Македонија ќе се соочи со светскиот крем во Хернинг.
Пеколна група во Данска
Ждрепката не беше милослива кон „црвено-жолтите“. На патот стојат домаќинот и светски шампион Данска, моќната Португалија и секогаш незгодната Романија. Сепак, Лазаров порачува дека неговиот тим не бара изговори.
„Нема да се жалиме, групата е таква каква што е. Кога сте во третиот шешир, нормално е да добиете велесила како Данска. Португалија се бореше за медал на последното првенство, а Романија има огромна традиција. Спортски е да се надеваме и да ветиме дека ќе го дадеме најдоброто од нас“, изјави Лазаров на денешниот собир.
Фокус на формата и поддршка за младите
Составот е главно идентичен со оној од претходниот Мундијал, со исклучок на повредениот Милан Лазаревски. Селекторот потенцираше дека ова е млада екипа (само двајца играчи се над 30 години) на која и е потребна поддршка од јавноста за да го издржи притисокот.
„Очекувам поддршка за овие млади момци. Ако ја почувствуваат таа енергија, ќе имаат поголем оптимизам. Јас сум тука да ги примам сите критики и да го понесам целиот товар, само оставете ги нив да играат. Бидејќи многумина не добиваат голема шанса во своите клубови, подготовките се дизајнирани со повеќе натпревари за да влезат во оптимална форма како колектив“, додаде селекторот.
План на подготовките: Контролни средби во Хрватска и Швајцарија
Македонија нема да губи време. Првиот сериозен тест е на 28 декември против Хрватска, а веднаш по Нова Година (8-10 јануари) следува силен турнир во Швајцарија каде ќе ги одмериме силите со домаќинот, Украина и Бахреин.
Европското првенство за нас започнува на 16 јануари со дуелот против гигантот Данска.
