Легендарната американска скијачка Линдзи Вон (41) првпат проговори за вистинските размери на повредата која ја претрпе на Зимските олимписки игри во Италија. Во емотивно видео на својот Инстаграм профил, Вон откри дека по тешкиот пад на спустот на 8 февруари, ситуацијата била толку критична што лекарите се бореле да не ѝ ја ампутираат левата нога.
Трка против времето: Дијагноза која ја заледува крвтта
Вон објасни дека нејзината нога била буквално „на парчиња“, но вистинската опасност дошла од т.н. компартмент синдром – екстремен притисок во мускулите кој го прекинува протокот на крв.
„Д-р Том Хакет ми ја спаси ногата од ампутација. Мораше итно да изврши фасциотомија, ги засече двете страни на мојата нога за да ја ослободи од притисокот и да ја остави да ‘дише’. Тој ме спаси“, изјави Вон со солзи во очите.
🚨 NEW: Lindsey Vonn Says She Is Out of the Hospital After Nearly Losing Her Leg
— Chief Nerd (@TheChiefNerd) February 23, 2026
“Dr. Tom Hackett saved my leg from being amputated … I'll be in a wheelchair for a while because I also broke my right ankle.” pic.twitter.com/hBworc4Ij0
Долг пат до закрепнување: Шестчасовна операција и трансфузија
Откако помина низ четири операции во Италија, Линдзи минатата недела се врати во САД каде веднаш беше подложена на нова, шестчасовна реконструктивна операција. Поради големата загуба на крв и нискиот хемоглобин, скијачката морала да прими и крвна трансфузија.
Моменталната состојба на големата шампионка останува критична и бара огромно трпение. Линдзи во моментов е во инвалидска количка и ќе биде неподвижна уште некое време, со оглед на тоа што покрај тешката скршеница на ногата, настрадал и нејзиниот глужд. Целиот процес на зараснување на коските се очекува да трае најмалку една година, а дури по тој период ќе се носи одлука за вадење на металните шипки и за евентуална последна операција на вкрстените предни лигаменти (ACL).
Крај на една ера?
Линдзи Вон се врати од пензија токму за овие Олимписки игри, само девет дена откако ги скина лигаментите на коленото на тренинг. Иако падот во Кортина изгледаше застрашувачки по само 13 секунди од трката, ретко кој претпоставуваше дека легендата се соочува со губење на екстремитет.
„Сега сум во хотел, тоа е голем чекор напред. Се надевам дека наскоро ќе бидам на патерици, но ќе ми требаат барем два месеци само за тоа“, додаде Вон.
