Иако неговата иднина на селекторското столче е неизвесна по истекот на договорот, Благоја Милевски денеска во Цирих професионално ја изврши својата должност, следејќи ја ждрепката која на Македонија ѝ го донесе патот до Данска.
Првиот впечаток е дека поминавме подобро од претходниот бараж, но Милевски повикува на претпазливост, жалејќи што фортуната не ни додели домашен терен.
„Ова не е Палермо, но нема лесни противници“
Споредувајќи ја ситуацијата со историскиот бараж за Катар 2022, Милевски истакна дека Данска е предизвик, но различен од „аждерите“ со кои се соочивме минатиот пат.
„За разлика од минатиот пат, кога ги извлековме топ фаворитите Италија и Португалија, сега на ‘хартија’ добивме полесен противник. Сепак, морам да потенцирам дека кога сте во конкуренција на најдобрите 16 репрезентации, нема лесни противници, напротив,“ изјави Милевски веднаш по ждрепката.
Жалот за Скопје
Она што останува како „горчлив вкус“ е фактот што Македонија повторно ќе мора да брка историја на гостински терен, прво во Данска (26 март), а евентуално и во финалето кај подобриот од Чешка и Ирска.
„Штета што повторно немавме среќа за евентуален домашен натпревар. Данска е извонредно квалитетна репрезентација и неблагодарно е да даваме прогнози. Но, ќе дадеме сè од себе да бидеме конкурентни,“ заклучи селекторот.
Следете нè: Facebook | Instagram | X
