Селекторот на македонската репрезентација до 17 години, Влатко Колев, го обелодени списокот на фудбалери на кои ќе смета за претстојниот турнир од елитната фаза за пласман на Европското првенство. Нашите млади „рисови“ се соочуваат со еден од најтешките предизвици во поновата историја на младинскиот фудбал, бидејќи патот до завршницата на ЕП води преку вистински фудбалски гиганти.
Турнирот ќе се одржи во Словенија во периодот од 25 до 31 март, а Македонија се наоѓа во група со домаќинот Словенија, но и со светските велесили Германија и Франција.
Интернационален шмек и таленти од европските гиганти
Списокот на Колев е доказ дека македонските таленти сè почесто се мета на големите европски клубови. Во составот се наоѓаат фудбалери кои веќе ги калат своите вештини во академиите на тимови како Фенербахче (Бленди Љачка), Црвена Звезда (Александар Јулиан Петровски и Лука Трпески), германски Падерборн (Јаков Стојковски) и швајцарски Сервет (Грегоријан Михајловски). Овој микс на играчи од домашниот шампионат и интернационалци треба да биде клучот за достоен отпор против фаворитите.
Распоред на натпреварите: Огнот почнува против „Панцирите“
Македонија квалификациите ги отвора на најтешкиот можен начин – против Германија на 25 март. Три дена подоцна следи дуелот со физички моќната Франција, додека турнирот го затвораме на 31 март против домашната селекција на Словенија.
Комплетниот список на повикани фудбалери:
Голмани: Амин Суљовиќ (Скопје), Даријан Денковски (Слога Виница), Ринор Цека (Шкендија);
Одбрана: Грегоријан Михајловски (Сервет), Марко Иванов (Копер), Филип Цветковски (Вардар), Павел Рибарски (Вардар), Павел Миронски (Македонија Ѓ.П.), Алек Чедомирски (Македонија Ѓ.П.);
Среден ред: Лука Јасмин Георгиев (Вардар), Марко Мирчевски (Охрид Лихнидос), Андреј Цветковски (Вардар), Мартин Џангаровски (Македонија Ѓ.П.), Александар Јулиан Петровски (Црвена Звезда), Бленди Љачка (Фенербахче), Арда Иљазовски (Б93);
Напад: Јаков Стојковски (Падерборн), Васко Папалиски (Скопје), Мелдин Аломеровиќ (Слован Љубљана), Фадиљ Исламовиќ (Кустошија), Лука Трпески (Црвена Звезда).
