Кошаркарите на МЗТ Скопје покажаа зошто се актуелни шампиони. Во големото дерби на 6. коло, „штрковите“ славеа на најжешкиот терен во лигата, во Битола, против Пелистер со 67-72 и му го нанесоа првиот сезонски пораз (5-1) на тимот што досега беше перфектен.
Натпреварот беше вистинско дерби – тврд, нервозен и израмнет во првиот дел, по кој домаќинот водеше со 32-29.
Но, МЗТ го „стегна обрачот“ во продолжението. Во последната четвртина, шампионот заигра како што му доликува – ја „заклучи“ одбраната (Пелистер не постигна поен четири и пол минути), направи серија, се одлепи на двоцифрена предност (49-59) и рутински го реши мечот.
Дека дербито беше „жешко“ покажа и тензичниот финиш. Пелистер не го издржа притисокот, па во последната минута, поради бурни протести на една судиска одлука, беа исклучени тренерот и службениот претставник на „зелено-белите“.
МЗТ до победата го водеше феноменалниот Мекфеден со 20 поени, додека центарот Гил имаше моќен „дабл-дабл“ од 17 поени и 11 скока. Кај Пелистер, Стајиќ (17п) и Малешевиќ (16п) беа недоволни.
Следете нè: Facebook | Instagram | X
