Во денови кога македонскиот фудбал бара пат за излез од кризата, добро е да се потсетиме на луѓето кои ги поставија темелите. На луѓето за кои дресот беше светиња, а победата прашање на национална чест.
Денеска е голем ден за македонскиот спорт. Првиот селектор на самостојна Македонија, легендарниот Андон Дончевски, го прославува својот 90-ти роденден!.
Популарниот „Чичко Дончо“ е човекот кој со право го носи епитетот „Татко на модерниот македонски фудбал“.
Вардарец до коска: 217 голови и историската титула
Роден во Кавадарци на 19 ноември 1935 година, Дончевски стана синоним за ФК Вардар. Како играч, тој беше страв и трепет за голманите низ поранешна Југославија.
Бројките се немилосрдни:
- 335 настапи за Вардар.
- 217 постигнати голови – апсолутен клупски рекорд кој веројатно никогаш нема да биде срушен!.
Но, неговата легенда не завршува тука. Како тренер, тој го предводеше Вардар до најголемиот успех во историјата – шампионската титула во СФРЈ во сезоната 1986/87.
Архитектот на „Крањ 1993“
Кога Македонија стана независна, имаше само еден човек доволно храбар и авторитетен да застане на чело. Дончевски е првиот селектор во историјата (1993-1995).
Тој ја водеше Македонија на историскиот, прв натпревар во Крањ против Словенија, каде што победивме со убедливи 1-4. Тоа беа времиња кога се играше со неверојатен патриотизам, вредност која Дончевски ја носеше во себе.
Последниот Мохиканец во Австралија
Иако со децении живее во далечната Австралија, срцето на Дончо чука само за Македонија. Тој е ерудит, полиглот кој зборува англиски, француски, руски, грчки и арапски, но пред сè – тој е голем родољуб.
Добитник е на награда за животно дело и е прогласен за „Спортски амбасадор“.
Денес, кога полни 90 години, му посакуваме само едно: Да е жив и здрав и да дочека уште многу радости од неговиот Вардар и неговата Македонија.
Среќен роденден, Селекторе! 🔴⚫🇲🇰
