Македонската фудбалска фаланга повторно е подготвена за инвазија! Иако натпреварот се игра на далечниот север, љубовта кон националниот дрес не познава граници. Според последните информации, над 1.000 македонски навивачи веќе ги обезбедиле своите влезници за стадионот „Паркен“ во Копенхаген.
„Црвено-жолта“ поддршка на „Паркен“
Интересот за историскиот дуел со Данска на 26 март е огромен. Покрај навивачите кои ќе отпатуваат директно од Македонија, се очекува голема поддршка и од нашите иселеници од Скандинавија, Германија и цела Западна Европа.
Македонскиот сектор на стадионот веројатно ќе биде исполнет до последното место, што ќе им даде дополнителен ветар во грб на избраниците на Гоце Седлоски во нивната мисија за пласман на Светското првенство.
Спектакл во најава
Со оглед на тоа што до натпреварот има уште десет дена, оваа бројка се очекува да порасне. Македонските фанови веќе се организираат преку социјалните мрежи за заеднички собири низ улиците на Копенхаген, најавувајќи уште една незаборавна атмосфера каква што приредуваа во Букурешт, Амстердам и Палермо.
