Сезоната 2025 во Формула 1 доби нов слој неизвесност. Во Баку, Макс Верстапен ја намали предноста на Мекларен дуото Оскар Пијастри и Ландо Норис, потсетувајќи дека борбата за титулата е далеку од завршена.
Со уште седум трки и три спринт викенди до крајот, само 69 поени ги делат водечкиот Пијастри, второпласираниот Норис и Верстапен кој демне од третата позиција. Во падокот веќе се зборува дека сега ова е трка за титулата на тројца возачи. Дали можеме да очекуваме ново неверојатно враќање?
Историјата вели – да. Формула 1 отсекогаш знаела да испише приказни за големи кам-бек шампиони.
1976 – Џејмс Хант против Ники Лауда
Една од најпознатите сезони во историјата. Ники Лауда имаше убедливо водство, но неговата страшна несреќа на Нирбургринг го сврте текот на сезоната. Само два месеца подоцна, Лауда се врати со неверојатна храброст и успеа да остане во игра за титулата. Во последната трка во Фуџи, поради силен дожд, реши да се повлече, а трето место на Хант му ја донесе единствената титула во кариерата.
1982 – Единствениот трофеј на Кеке Росберг
Без ниту една победа длабоко во сезоната, Финецот изгледаше далеку од титула. Но несреќата на Дидие Пирони ја смени сликата. Росберг победи во Дижон, собра доволно поени и со петто место во последната трка во Лас Вегас ја обезбеди својата прва и единствена шампионска титула. Приказна за трпение и искористување на секоја шанса.
2007 – Кими Раиконен го украде тронот
Мекларен беа во фокусот, со новајлијата Луис Хамилтон и двојниот шампион Фернандо Алонсо кои водеа жестока битка. А Кими Раиконен? Тивко собираше поени и чекореше кон чудо. Со победи во Кина и Бразил, од заостанување од 17 поени со две трки до крај, стигна до титула со само еден поен предност. Ледената смиреност на “Ајсменот” останува една од најголемите сензации во историјата на овој спорт.
2012 – Себастијан Фетел и драмата во Бразил
Фернандо Алонсо имаше стабилна предност, но Фетел ја запали втората половина од сезоната со четири последователни победи. Во финалето во Бразил, по само неколку свиоци, Германецот се најде последен по контакт со Бруно Сена. Со оштетен болид и променливи услови, Фетел се врати до шестото место, што беше доволно за да ја освои титулата со само три поени пред Алонсо. Ова стана запаметено како една од најепските трки во Формула 1.
2014 – Хамилтон против Росберг, почеток на ривалството
Првата хибридна сезона ја отвори доминацијата на Мерцедес. Росберг ја презеде предноста на полусезона, но Хамилтон одговори со неверојатна серија од шест победи во последните седум трки. Во финалето во Абу Даби, проблемите на Росберг го оставија на 14 место, додека Хамилтон ја славеше својата втора титула и го разгоре едно од најжестоките ривалства на новата ера.
Дали 2025 ќе биде следната голема приказна?
Сега, сите погледи се вперени кон Верстапен. Пред него се двајца гладни Мекларен возачи, млади и амбициозни. Сезоната е долга, шансите се отворени, а Формула 1 повторно не учи на едно – титула не е освоена сè додека не падне последното карирано знаме во Абу Даби.
