Џек Дуан официјално останува дел од Формула 1 падокот и во 2026 година. По турбулентниот период и разделбата со тимот на Алпин, 23-годишниот австралиски возач беше промовиран во нов резервен возач на американскиот тим Хас.
Дуан, кој е син на легендарниот Мото ГП шампион Мик Дуан, ќе ја дели оваа улога со Јапонецот Рио Хиракава, стоејќи како „џокер“ од клупата доколку Естебан Окон или Оли Берман не бидат во можност да настапат.
Краток и горчлив престој во Алпин
Кариерата на Дуан како главен возач во Алпин траеше само 150 дена. По дебито во Абу Даби во 2024 година, тој стартуваше на првите шест трки од сезоната 2025, но лошите резултати и тешкиот судар во Сузука доведоа до негова експресна замена со Франко Колапинто веднаш по трката во Мајами.
По неколку месеци во „немилост“, Дуан и Алпин минатиот месец спогодбено го раскинаа договорот, што му ги отвори вратите за нов ангажман.
Шанса за рехабилитација кај Хас
Иако во 2026 година нема да биде на стартната позиција како постојан возач, улогата во Хас е идеална шанса за Џек да остане во форма. Тој ќе биде вклучен во обемната програма за приватни тестирања на тимот со болиди од претходните години, што ќе му овозможи да собира вредни километри и да остане на радарот на менаџерите.
„Возбуден сум што му се приклучувам на тимот на Хас. Ова е идеално место за да ја продолжам мојата кариера во Формула 1. Сакам да му се заблагодарам на тимот за шансата заедно да растеме и да се соочиме со предизвиците на сезоната 2026“, изјави Дуан.
За Дуан, ова е „ресетирање“ на кариерата. Далеку од огромниот притисок во Алпин, тој сега има можност во постабилна средина да ја врати самодовербата и да покаже дека заслужува втора шанса за постојано седиште во Ф1.
