ГРК Охрид продолжува со засилувањата во својата историска сезона. Клубот денеска официјално го потврди ангажманот на јапонскиот репрезентативец Косуке Јасухира, кој доаѓа како позајмен играч до крајот на тековната сезона.
Јасухира, кој веќе остави длабока трага во македонскиот ракомет со своите извонредни партии во дресот на Вардар пред две сезони, во Охрид пристигнува од екипата на Бурган од Кувајт. 25-годишниот среден бек се очекува да биде клучниот мотор во играта на охриѓани во борбата за висок пласман.
Јасухира: Едвај чекам да заиграм пред охридските навивачи
Јапонскиот „магионичар“ не го криеше задоволството што повторно ќе игра во Македонија, каде веќе е миленик на љубителите на ракометот.
„Пресреќен сум што се враќам во Македонија. Во тимот имам добри пријатели од времето во Вардар и едвај чекам да заиграм за Охрид. Мојот деби настап го очекувам уште утре на дербито против Тиквеш. Среќен сум за пречекот од навивачите, нивната поддршка ми дава дополнителна мотивација да им помогнам на соиграчите за поуспешна сезона“, изјави Јасухира по потписот.
Косуке во Охрид ќе го носи дресот со број 13, а неговото деби се очекува да донесе дополнителен квалитет и брзина во ростерот на охридскиот суперлигаш.
