Австралискиот возач на Мекларен, Оскар Пијастри, конечно го покажа својот раскошен талент во 2026 година, освојувајќи го второто место на Големата награда на Јапонија. По вистински хорор почеток на сезоната, каде не успеа ниту да ги стартува првите две трки, Пијастри во Сузука потсети зошто важи за еден од најдобрите млади возачи на гридот.
Сепак, и покрај одличниот резултат, кај него остана горчлив вкус поради тајмингот на безбедносното возило кој веројатно го чинеше и победа на култната јапонска патека.
Од аутсајдер до лидер во само еден свиок
Пијастри влезе во овој викенд како единствениот возач кој сè уште немаше комплетирано ниту еден круг во трка оваа сезона. По бизарниот судир во Австралија уште во кругот за загревање и дефектот со електрониката во Кина, Пијастри во Јапонија тргна „на сè или ништо“.
Со брилијантен старт од третата позиција, тој успеа да ги претекне Антонели и Расел уште во првиот свиок и да го преземе водството. Австралиецот извонредно го контролираше темпото и успеваше да го задржи Расел зад себе, сè додека не влезе во боксот за нови гуми.
Безбедносното возило како пречка до победата
Клучниот момент се случи само неколку круга по неговото менување гуми. Тешкиот судир на Оли Берман го извади безбедносното возило на патеката, што му овозможи на Кими Антонели „бесплатен“ бокс и избивање на чело на колоната. Пијастри едноставно немаше одговор за брзината на Мерцедес по рестартот.
„Изгледа сме сосема во ред кога конечно ќе ја стартуваме трката. Ќе беше навистина интересно да видиме што ќе се случеше без безбедносното возило. Успевав да го држам Џорџ (Расел) зад себе и дури почнавме малку да се одлепуваме пред влегувањето во бокс“, изјави Пијастри со доза иронија на своја сметка.
Мекларен се враќа во игра
Иако финишираше со 13 секунди заостанување зад победникот Антонели, Пијастри смета дека овој резултат е огромен поттик за тимот од Вокинг.
„Штета е што не видовме до каде можевме да одиме, но мислам дека во овој момент да бидеме разочарани од второ место е всушност многу добра позиција за нас. Благодарност до тимот, ги искористивме сите можности денес, иако знаеме дека ни треба уште малку перформанси за да се бориме за победи на секоја патека“, заклучи Пијастри.
Со овие 18 бодови, Пијастри конечно го активираше своето конто во генералниот пласман, по само двата бода освоени во спринт трката во Кина.
