Првиот тест за новата ера на Формула 1 во Барселона заврши. Иако се одвиваше зад затворени врати, со ригорозни безбедносни мерки и без ТВ пренос, информациите протекоа. Она што го дознавме е дека новите болиди и мотори функционираат подобро од очекуваното, а хиерархијата веќе почнува да се наѕира.
Додека Ф1 се обидуваше да го „шеќероса“ известувањето (нарекувајќи ги големите судари „мали излетувања“), реалноста на патеката понуди фасцинантни увиди. Мерцедес изгледа како тимот што треба да се победи, Ферари тивко ја заврши работата, а новите мотори на Ред Бул ги замолкнаа критичарите.
Мерцедес е вистинскиот репер
Ако 2014 година беше почеток на доминацијата на Мерцедес во хибридната ера, 2026 година мириса на слично сценарио. Тимот од Брекли постави стандард што никој друг не можеше да го следи во однос на километражата.
Тие не возеа на последниот ден (петок), а сепак останаа лидери во собрани податоци. Нивниот мотор комплетираше 1.132 круга (над 5.200 км), што е застрашувачка бројка за сосема нова погонска единица. Повратните информации од возачите се дека болидот е подобар во реалноста отколку во симулаторот, а „возливоста“ на моторот е одлична и покрај отстранувањето на MGU-H компонентата. Мерцедес изгледа подготвен, брз и чекор пред сите, вклучувајќи ги и своите клиенти (Мекларен и Вилијамс).
Ферари е скриениот фаворит
Ферари беше „тивкиот хит“ на овој тест. Започнаа тивко, но продуктивно, и покрај лошите временски услови првиот ден. На крајот на неделата, Луис Хамилтон скокна на врвот на табелата со времињата, потврдувајќи го потенцијалот на SF-26.
Тимот помина над 2.000 километри, а моторот на Ферари (вклучувајќи ги и клиентите) собра 989 кругови. Фред Васур е задоволен, а Хамилтон веќе изјави дека овој предсезонски старт е подобар од оној во 2025 година. Со оглед на тоа што ова е само „Спец-А“ верзија на болидот, во Маранело имаат многу причини за оптимизам.
Изненадувањето: Ред Бул и Форд
Најголемото прашање беше: Може ли Ред Бул да направи свој мотор? Џорџ Расел од Мерцедес призна дека е „изненаден и импресиониран“ од она што го виделе.
Моторот на „Red Bull Powertrains“ (RBPT) функционираше беспрекорно. Со 622 комплетирани кругови (повеќе од Ауди и Хонда заедно), тие докажаа дека се подготвени. Иако младиот Исак Хаџар го искрши болидот удирајќи во ѕид, што го чинеше тимот драгоцено време, Макс Верстапен успеа да комплетира 118 кругови во петокот. Макс изјави дека тимот „одлично стартувал“, а техничкиот директот Тим Гос ја нарече возливоста на моторот „фантастична“.
Проблемите на Ауди и отсуството на Вилијамс
За новиот фабрички тим Ауди, ова беше тест на издржливост. Со само 240 кругови и два црвени знамиња предизвикани од дефекти (вклучувајќи хидраулично истекување кај Хулкенберг), почетокот беше тежок. Сепак, тимот успеа да се опорави во петокот, комплетирајќи 60% од својата вкупна километража во последниот ден. Шефот Матија Биното призна дека листата на работи што треба да се поправат е „најдолгата што некогаш ја видел“.
Најголемиот губитник на неделата е Вилијамс, кој воопшто не се појави на патеката. Иако Џејмс Ваулс тврди дека фокусот е на виртуелно тестирање, отсуството од првиот реален тест е лош знак за тимот кој ветуваше враќање кон врвот.
Кадилак, како најнов тим, имаше очекувано бавен старт (само 44 кругови првиот ден) и заостанување од 4.6 секунди, но за нив ова е фаза на „решавање проблеми“.
Астон Мартин е „Дивата карта“ на Њуи
Светот чекаше да го види првиот дизајн на Адријан Њуи за Астон Мартин. AMR26 пристигна доцна, но изгледа радикално различно од останатите, со уникатна архитектура и аеродинамика. Се верува дека болидот е сè уште со прекумерна тежина, но визуелно е најголемата енигма. Соработката со Хонда (која имаше само 65 кругови) допрва ќе се тестира.
Како изгледаат новите болиди?
Визуелно, болидите за 2026 се помали и поестетски од претходниците. На патеката, разликата е очигледна: помала брзина во свиоците (поради намалениот „downforce“), но брутално забрзување и поголема брзина на правците. Звукот е подобрен – помоќен и погласен, бидејќи веќе го нема MGU-H системот да го пригушува звукот.
Заклучок: ПР автогол на Ф1
Додека тимовите работеа, Ф1 раководството доби критики за третманот кон фановите. Обидите на полицијата да ги брка гледачите од ридовите околу патеката и „филтрираните“ извештаи кои ги криеја проблемите на патеката, оставија лош впечаток.
Сепак, заклучокот е јасен: Новата ера започна посигурно од очекуваното. Сигурноста на болидите е на високо ниво, а Мерцедес фрли ракавица во лице на сите уште пред да пристигнат во Бахреин.
