Фудбалерите на Пари Сен Жермен ја одбранија титулата во француската Лига 1 по петти пат по ред, но начинот на кој го подигнаа својот 14-ти шампионски пехар ќе остане запишан како најбизарниот и најнеобичниот момент во историјата на фудбалот.
Избраниците на Луис Енрике ја заверија титулата уште во средата со победата над Ленс (2-0), благодарение на головите на Квича Кварацхелија и Ибрахим Мбаје. Но, вистинскиот бизарен момент се случи синоќа на градското дерби против Парис ФК, кога ПСЖ беше принуден да го крене пехарот пред почетокот на натпреварот и пред воопшто да започне официјалното загревање.
🔴🔵 Before PSG play their rivals Paris FC away from home, they lifted the Ligue 1 trophy! 🏆✅ pic.twitter.com/PxWnzVv7ai
— EuroFoot (@eurofootcom) May 17, 2026
Како Парис ФК и полицијата им ја уништија забавата?
Оваа нереална ситуација се случи поради тотален колапс во организацијата и одбивањето на сите инволвирани страни да соработуваат. Првично, Професионалната фудбалска лига на Франција (ЛФП) побара од домаќинот Парис ФК церемонијата да се одржи по завршувањето на натпреварот на стадионот „Жан-Буин“.
Сепак, раководството на Парис ФК експресно го одби ова барање со образложение дека имаат сопствена програма за крајот на сезоната, која вклучува испраќање на фудбалерите кои си заминуваат и голем огномет за нивните навивачи. Од таму кратко порачаа дека „не е добра идеја“ ПСЖ да слави на нивен терен.
Како алтернатива, ПСЖ понуди прославата да се пресели веднаш по мечот на нивниот „Парк на принцовите“, кој е оддалечен на само 200 метри, но таму со рампа излезе париската полиција. Провинциските власти го блокираа настанот поради безбедносни причини и страв од големи навивачки немири по 23 часот.
Без подиум, за само 30 минути, пред 1.000 навивачи
Бидејќи немаше друго решение, челниците мораа да ја прифатат единствената преостаната опција – брза и импровизирана церемонија во аголот на стадионот каде што беа сместени вистинските навивачи на ПСЖ.
Со гостинската трибина во позадина, целиот тим на ПСЖ дојде пред гостинскиот сектор каде што беа сместени околу 1.000 нивни фанови. Без никаков свечен подиум, капитенот Маркињос едноставно го подигна пехарот во вис. Сè на сè, „прославата“ траеше едвај 30 минути, по што фудбалерите го оставија пехарот и веднаш започнаа со редовното преднатпреварувачко загревање.
За казна или иронија, натпреварот заврши со реми (1-1), откако Бредли Баркола погоди за ПСЖ, а Алимами Гори израмни за домаќините. Сепак, најголемиот удар за ПСЖ на овој меч не беше резултатот, туку повредата на актуелниот освојувач на „Златната топка“, Усман Дембеле. Тој мораше предвреме да го напушти теренот во првото полувреме, што носи огромни главоболки за Луис Енрике пред големото финале во Лигата на шампионите каде ПСЖ за неколку дена ќе се соочи со Арсенал.
