Директорот на тимот на Валентино Роси, Учио Салучи, откри дека тимот планира драстична промена во возачката постава за 2027 година, што значи дека еден од актуелните асови ќе мора да ги пакува куферите.
Тимот на ВР46 веќе почна да ги крои плановите за новата техничка ера во МотоГП, кога моторите од 1.000 ќе бидат заменети со машини од 850 кубици. Главната стратегија на „Докторот“ и неговите соработници е јасна: еден искусен возач и еден млад талент.
Крај на патот за Морбидели или Ди Џанантонио?
Со оглед на тоа што Фабио Ди Џанантонио (28) и Франко Морбидели (31) веќе влегуваат во зрелите тркачки години, планот на Салучи дефинитивно значи дека за еден од нив нема да има место по истекот на договорите во 2026 година.
„Мојата идеја е да имаме еден искусен и еден млад возач. Сè уште сме во фаза на работа, одлуката е тешка, но тоа е патот по кој сакаме да одиме,“ изјави Салучи за Motorsport.com.
Кој е на радарот на Роси?
Иако Валентино Роси не крие дека би сакал да го види Педро Акоста во своите редови, реалноста е дека шпанскиот „вундеркинд“ најверојатно ќе заврши во фабричкиот тим на Дукати. Поради тоа, главна мета на ВР46 станува Фермин Алдегер, младиот ас кој веќе подолго време важи за еден од најголемите потенцијали во светот на мотоциклизмот.
Диџа во предност пред Морбидели?
Иако се најавува заминување, се чини дека Фабио Ди Џанантонио има „бетонски“ статус кај Салучи. Неговите константни настапи во 2025 година, кога заврши како шести во генералниот пласман, го натераа тимот веќе да подготвува нов договор за него.
Од друга страна, Франко Морбидели ќе мора сериозно да се избори за своето место. Критериумот за двајцата возачи во 2026 година е брутален: Борба за Топ 5 позиции на секоја трка.
Гостинска статија на Марија Петровска
