Тренерот на Реал Мадрид, Алваро Арбелоа, не го криеше огромното разочарување по завршувањето на спектакуларниот реванш во Минхен. Иако неговиот тим покажа карактер и се бореше до последен здив, елиминацијата од Баерн (4-3) остави горчлив вкус кај младиот стратег, кој по натпреварот прстот го впери кон судењето.
За Арбелоа, клучниот момент кој го скршил отпорот на неговиот тим бил црвениот картон на Едуардо Камавинга во финишот на средбата.
Според шпанскиот стратег, судијата првично не ни бил свесен дека Едуардо Камавинга веќе има жолт картон, сè додека не бил притиснат од домашните фудбалери.
„Судиите не го разбираат фудбалот“
Арбелоа беше видливо револтиран од начинот на кој Камавинга беше исклучен во 86-та минута, момент кој според него го решил патникот во полуфиналето.
„Верувам дека судијата го извади картонот само затоа што играчите на Баерн отидоа кај него да му кажат дека тоа е втор жолт. Ова е двојна грешка. Судиите честопати или не играле фудбал, или не знаат како да менаџираат вакви ситуации. Уште полошо е што не знае дека на играчот му покажал картон пред многу малку време, со оглед на тоа што Камавинга влезе во второто полувреме“, грмеше Арбелоа во прес-салата на „Алијанц Арената“.
Срцето на Реал е скршено: „Жртвата отиде во неповрат“
За Арбелоа, ова не е само пораз, туку чувство на длабока неправда која го погодила целиот „кралски“ клуб.
„Соблекувалната е скршена. Постои чувство на неправда и болка затоа што гледате како целиот труд, жртвата и сè што направивме на теренот е фрлено во вода поради една ваква акција на судијата. Се соочивме со големи тимови – со Баерн на Компани, Сити на Гвардиола, Атлетико на Симеоне… Моите играчи покажаа карактер и ја оставија душата на теренот, но некои работи не можете да ги контролирате“, додаде тренерот на Реал.
Човек на клубот до последен ден
И покрај шпекулациите за негова смена, Арбелоа останува со „крената глава“ и вели дека неговата единствена мисија била да му помогне на клубот.
„Јас сум човек на куќата. Ако сум болен денес, тоа не е поради мојата иднина, туку поради Реал Мадрид и затоа што нема да ја освоиме 16-та титула. Мојот процент на влијание врз овој тим е можеби мал во споредба со големите тренери, но секогаш се обидував да помогнам колку што можам. Ќе го браниме овој грб до последен ден, а одлуката за мојата иднина е во рацете на клубот и јас ќе ја почитувам“, заклучи Арбелоа.
Реал Мадрид сега мора брзо да се соземе, бидејќи веќе во вторник ги очекува натпревар од Ла Лига против Алавес на домашен терен за зачувување на честа во домашното првенство.
