Дуелот што го отвора 15-то коло од Првата македонска фудбалска лига носи стара позната приказна – кога Силекс игра во Кратово, никому не му е лесно. Но овојпат, пред нив доаѓа Арсими, тим кој минатата недела го запре актуелниот шампион Шкендија и уште еднаш потврди дека сезонава не е само учесник, туку сериозен фактор.
Силекс внимателен, но со јасна цел
Кратовци влегуваат во мечот со доза респект, но и со неизбежната домашна самодоверба. Свесни се дека Арсими е во подем, но и дека бодовите што се пред нив се премногу важни за да се пуштат лесно.
Шефот на стручниот штаб, Александар Васоски, ја постави атмосферата пред натпреварот:
„Нè чека тежок натпревар против Арсими, екипа која ја има мојата почит, не само поради победата над Шкендија, туку затоа што континуирано игра добро. Играме дома и тоа можеби ни носи мала предност, но знаеме дека нема да биде лесно. Ако сакаме да бидеме при врвот, мораме да победиме. Сите сме фокусирани само на овој дуел и очекувам квалитетна претстава и победа на Силекс“.
Во Кратово веруваат дека денот е нивен, но истовремено се внимателни, бидејќи токму таквите натпревари умеат да бидат најкомплицирани.
Арсими пристигнува со самодоверба и амбиција
Од другата страна, Арсими патува во Кратово со јасна филозофија: победата против Шкендија била само доказ дека нивниот проект созрева, и дека секој следен дуел е шанса да се потврдат.
Босанско-херцеговскиот интернационалец и стопер, Амир Дрљевиќ, ја опиша атмосферата меѓу Гостиварци:
„Победата над Шкендија ни донесе вистинска самодоверба и ритам. Атмосферата е одлична, сите сме мотивирани. Во Кратово одиме по позитивен резултат и да покажеме дека нашата форма не е случајност. Го почитуваме Силекс, особено на нивни терен, но веруваме во себе и во работата што ја направивме оваа недела. Ќе дадеме сè за да ги направиме навивачите горди и да останеме на нашиот пат кон сезонските цели“.
Сцената е подготвена
Еден тим игра дома и брани традиција. Друг доаѓа во подем и сака да докаже дека не е победник во епизоди. Формата, мотивацијата и тензијата се тука, останува само да се излезе на теренот.
Натпреварот меѓу Силекс и Арсими се игра утре во Кратово од 13:00 часот.
