Светот на тенисот со нетрпение го очекува новиот судир на „титаните“, а според денешните настапи во Доха, тој е сè поблиску. Светскиот рекет број два, Јаник Синер, го совлада Австралиецот Алексеј Попирин со 6-3, 7-5, додека прворангираниот Карлос Алкараз беше убедлив против Французинот Валентин Роје со 6-2, 7-5.
Неверојатната константност на Италијанецот
Синер продолжува со својата застрашувачка форма. Со денешната победа, Италијанецот стигна до четвртфинале на дури 28 од последните 30 турнири на кои настапил, серија која започна уште во 2023 година. Јаник има добиено 22 од последните 23 мечеви, а единствениот пораз му го нанесе Новак Ѓоковиќ во полуфиналето на Австралија Опен минатиот месец. Негов следен противник ќе биде младиот Јакуб Меншик.
Алкараз против Качанов, Циципас го „реши“ Медведев
Карлос Алкараз, кој минатата година го победи Синер во финалињата на Ролан Гарос и УС Опен, во следната рунда ќе се соочи со Карен Качанов. Шпанецот изгледа моќно на теренот и се чини дека повредата која го мачеше на почетокот на сезоната е веќе минато.
Најголемото изненадување на денот го приреди Стефанос Циципас. Гркот одигра фантастичен меч и го елиминираше Данил Медведев со 6-3, 6-4. За место во полуфиналето, Циципас ќе се бори против Андреј Рубљов, кој беше подобар од Марожан. Четвртфиналната слика ја комплетираат Артур Филс и Јиржи Лехечка.
Ако главните фаворити продолжат со ова темпо, недела во Доха би можела да ни донесе уште едно епско финале помеѓу двајцата наследници на големата тројка.
