Притисокот врз претседателот на ФИФА, Џани Инфантино, континуирано расте откако повеќе од 70 европски пратеници официјално побараа истрага против светската фудбалска куќа поради прекршување на принципот на политичка неутралност. Реакцијата доаѓа по контроверзната одлука да се укине суспензијата од еден натпревар за американскиот репрезентативец Фоларин Балогун за време на Светското првенство.
Телефонскиот повик од Трамп и укинатата казна
Балогун заработи црвен картон во натпреварот од шеснаесетинафиналето против Босна и Херцеговина, поради што требаше автоматски да го пропушти осминафиналниот дуел против Белгија. Сепак, независната дисциплинска комисија на ФИФА ја суспендираше казната, па 25-годишниот напаѓач беше стартер во поразот на САД од 4-1. Жалбата на Белгија пред почетокот на мечот беше експресно одбиена од страна на ФИФА.
Ситуацијата ескалираше кога американскиот претседател Доналд Трамп потврди дека лично му се јавил на Инфантино барајќи ревизија на казната, нарекувајќи го црвениот картон голема неправда. Инфантино ја бранеше својата улога тврдејќи дека судските тела на ФИФА се независни и дека за време на разговорот му објаснил на американскиот претседател дека постои правен процес кој се води според регулативите.
Европскиот парламент се повикува на статутот на ФИФА
Како директен одговор на овие случувања, 72 пратеници во Европскиот парламент испратија писмо до 27 претседатели на европските фудбалски асоцијации, барајќи итна истрага за процесот на донесување одлуки во овој случај. Овој потег следи откако кон крајот на јуни, 50 европратеници поднесоа етичка жалба против Инфантино бидејќи во декември 2025 година му ја додели „Наградата за мир на ФИФА“ на претседателот Трамп.
Во писмото до националните сојузи јасно се посочува дека Статутот на ФИФА во својот четврти член и Етичкиот кодекс во петнаесеттиот член строго наложуваат политичка неутралност за сите фудбалски функционери, со предвидени строги санкции за секое прекршување на ова правило. Пратениците апелираат до асоцијациите да реагираат и да повикаат на одговорност за лицата што ги прекршуваат прописите.
Остри реакции од УЕФА и најава за жалба до МОК
Случувањата предизвикаа остри реакции низ целиот спортски свет. Невладината организација „ФерСквер“ најави поднесување официјална жалба до Меѓународниот олимписки комитет поради континуираното кршење на правилата за политичка неутралност од страна на претседателот на ФИФА.
Потпретседателката на УЕФА, Лаура Мекалистер, предупреди дека овој случај создава исклучително опасен преседан кој им овозможува на политичките лидери да влијаат врз спортските казни заработени на теренот. Самата европска куќа на фудбалот преку официјално соопштение ја критикуваше одлуката за укинување на суспензијата, нарекувајќи ја неразбирлива и истакнувајќи дека со овој потег дефинитивно е мината црвената линија.
