Главниот град денеска дишеше во знакот на спортот, женската енергија и здравиот начин на живот. По 14-ти пат, булеварот „Илинден“ стана подиум за повеќе од 3.400 жени и девојки, кои учествуваа на традиционалната „Авицена женска трка“. Со старт и цел кај фонтаната „Лотос“, Скопје уште еднаш покажа дека масовноста и рекреацијата кај припадничките на поубавиот пол се во постојан подем.
Настанот започна во 10 часот со енергично аеробик загревање, по што следеше трката на патеката долга 3 километри, која ги обедини сите генерации од најмладите, па сè до највозрасните хероини.
Душица Јанковиќ најбрза на асфалтот
Иако во прв план беше дружењето и рекреацијата, натпреварувачкиот дух не изостана. Најбрза на патеката денеска беше Душица Јанковиќ, која целта ја помина со одлично време од 11 минути и 24 секунди.
Веднаш зад неа, на второто место на пиедесталот се искачи Викторија Тодоровска (11:58), додека третата позиција ѝ припадна на Емили Ивановска, која трката ја заврши за 12 минути и 6 секунди.
Историја: Трчаа и дами над 80 години!
Ова издание на трката ќе остане запаметено по својата инклузивност. За прв пат во историјата на настанот беше воведена категорија за учеснички над 80 години, докажувајќи дека годините се само бројка кога станува збор за љубовта кон движењето и активниот живот.
Организаторите доделија награди во десет различни возрасни категории, а по официјалниот дел беше одржана и традиционалната лотарија со бројни подароци за најсреќните учеснички.
Совршена организација под покровителство на Град Скопје
Трката помина во беспрекорна атмосфера, во организација на Сојузот на спортови на Скопје, во ко-организација со АК Скопски маратон и АК Работнички, а под покровителство на Град Скопје. Со посебниот сообраќаен режим и поддршката од илјадници граѓани покрај патеката, „Авицена женска трка“ уште еднаш потврди дека е еден од најпрепознатливите и најомилените спортски брендови во главниот град.
