Помалку од 12 месеци откако ја освоија Премиер лигата, фудбалерите на Ливерпул се наоѓаат во сериозна криза. Ремито против Тотенхем (1-1) со примен гол во 90. минута предизвика ерупција од незадоволство на „Енфилд“, каде домашните играчи беа испратени со гласни свирежи.
Тренерот Арне Слот, кој се наоѓа под огромен притисок пред клучниот реванш во Лигата на шампионите против Галатасарај, отворено зборуваше за фрустрацијата на навивачите и критиките од јавноста. Ливерпул во моментов е на петтото место во домашното првенство, а во Европа брка негатива од 1-0 против турскиот шампион.
Слот ја презема вината: Ова не е убаво чувство
Холандскиот стратег не се криеше зад изговори кога беше прашан за револтот на трибините. Тој призна дека е свесен за специфичната култура на навивачите на Ливерпул и токму затоа свирежите го болат уште повеќе.
„Кога дојдов тука, луѓето ми кажуваа дека овој клуб е поинаков и дека навивачите го поддржуваат менаџерот многу долго време, и во добри и во лоши моменти. Затоа, ако претпоставиме дека сега не се среќни со мене, тогаш очигледно сум направил многу работи погрешно. Тоа никогаш не е убаво чувство“, искрен беше Слот, додавајќи дека фудбалот е таков спорт каде само победите можат брзо да ја променат атмосферата.
"I must have done a lot of things wrong" 😤
— Sky Sports News (@SkySportsNews) March 17, 2026
Arne Slot admits that it's 'not a nice feeling' to feel unhappiness from Liverpool supporters as his side prepare to face Galatasaray at Anfield 🔴 pic.twitter.com/4zLLkev7HI
Одговор за Карагер: Ние не сме „тим од поединци“!
Легендата на клубот, Џејми Карагер, неодамна изјави дека ќе биде „навистина тешко“ за Слот да ја врати довербата кај фановите, нарекувајќи го актуелниот состав „тим од поединци“. Слот жестоко се спротивстави на оваа констатација.
„Се согласувам со многу работи што Џејми ги кажа оваа сезона, но со ова апсолутно не се согласувам. Тим кој се откажал, кој е составен од себични поединци или кој не работи заедно, не би покажал таква отпорност по нашиот 120-ти удар оваа сезона. Тоа е малку преувеличено, иако признавам дека имавме многу падови“, истакна тренерот на „црвените“.
„Енфилд“ бара пресврт против Галатасарај, Робертсон бара константност
Слот сега го насочува целиот фокус кон Галатасарај, надевајќи се дека ќе го одведе Ливерпул во нивното прво четвртфинале во ЛШ од 2022 година, што би било и негово прво во кариерата.
Во меѓувреме, еден од најискусните во тимот, Енди Робертсон, ја потенцираше главната болка на тимот – недостатокот на константност. „Фрустрирани сме. Токму константноста минатата сезона нè одвои од сите други и затоа толку лесно ја освоивме титулата“, изјави 32-годишниот Шкотланѓанец.
Робертсон одби да зборува за својата иднина, иако неговиот договор истекува ова лето, а во јануари беше на чекор од трансфер токму во Тотенхем. По 371 настап за клубот, неговиот фокус сега е само на „огромниот меч во Лигата на шампионите“.
